Չեմպիոնների լիգայի 1/8 եզրափակիչի ևս երկու հանդիպումներ կկայանան այսօր: Անշուշտ, հայ ֆուտբոլասերին ավելի շատ հետաքրքրում է «Շախտյոր»-ի մասնակցությամբ խաղը, որտեղ հանդես է գալիս Հենրիկ Մխիթարյանը, բայց այս փուլի և ամենայն հավանականությամբ Չեմպիոնների լիգայի ընթացիկ ամբողջ խաղարկության կենտրոնական դիմակայությունը «Արսենալ»-«Բարսելոնա»-ն է:
Այս թիմերը միմյանց հանդիպել են 5 անգամ և բոլոր դեպքերում Չեմպիոնների լիգայի շրջանակներում` 1999/00 մրցաշրջանի առաջին խմբային փուլ. «Բարսելոնա»-«Արսենալ»` 1:1, «Արսենալ»- «Բարսելոնա»` 2:4: 2005/06 մրցաշրջանի եզրափակիչ. «Բարսելոնա»-«Արսենալ»` 2:1: 2009/10 մրցաշրջանի քառորդ եզրափակիչ. «Արսենալ»- «Բարսելոնա»` 2:2, «Բարսելոնա»-«Արսենալ»` 4:1:
Թիմերն իրենց առաջնություններում.
«Արսենալ»-ն Անգլիայի ընթացիկ առաջնությունում ընթանում է երկրորդ հորիզոնականում և երրորդ տեղում ընթացող «Մանչեսթր Սիթի»-ին ոչ միայն գերազանցում է 4 միավորով, այլև մեկ խաղ պակաս է անցկացրել: Վերջին 12 հանդիպումներում պարտվել է միայն առաջատար «Մանչեսթր Յունայթեդ»-ին:
Իսպանայի առաջնությունում «Բարսելոնա»-ն ընդամենը մեկ մրցակից ունի` Մադրիդի «Ռեալ»-ը, այն էլ վերապահումով. կատալոնացիները 5 միավորով գերազանցում են երկրորդ տեղում ընթացող «արքայական» ակումբին: Անցկացրած 23 հանդիպումներում ընդամենը 1 պարտություն է կրել. 16 հանդիպումներից բաղկացած ռեկորդային հաղթական սերիան միայն վերջին տուրում «Սպորտինգ Խիխոն»-ի հետ խաղացած ոչ-ոքիով ընդհատվեց:
Մարզիչների խոսքը.
Արսեն Վենգեր. «Մենք տրամադրված ենք բոլորին ցուցադրել, որ արդեն բոլորովին այլ թիմ ենք: «Բարսելոնա»-ն աշխարհի ուժեղագույն ակումբն է, և եթե հաջողվի անցնել նրանց արգելքը, ապա հրաշալի հնարավորություն կունենանք ամբողջ մրցաշարը հաղթելու: Նախորդ տարի նրանք մեզնից ուժեղ էին, բայց հավատում եմ իմ խաղացողներին, նրանք 100 տոկոսով պատրաստ են այս դիմակայությանը: Մենք վստահ ենք մեր ուժերին և ի տարբերություն մյուս տարիների գրեթե բոլոր խաղացողներն իրենց լավագույն մարզավիճակում են ներկայանալու այս հանդիպմանը»:
Պեպ Գվարդիոլա. «Դժվար թե այս հանդիպումը հեշտ լինի մեզ համար: Ինձ դուր է գալիս «Արսենալ»-ը, բայց ես չեմ սիրում նրանց դեմ խաղալ: Մեզ չափազանց բարդ հանդիպում է սպասվում Լոնդոնում, հնարավոր է ամենաբարդն այս մրցաշրջանում»:
Թիմերի նախնական կազմերն ունեն հետևյալ տեսքը.
Արսենալ` Շեսնի, Էբուե, Ջուռու, Կոսելնի, Կլիշի, Սոնգ, Ուիլշաեր, Ուոլքոթ, Ֆաբրեգաս, Արշավին, վան Պերսի:
«Բարսելոնա»` Վալդես, Ալվեշ, Պիկե, Աբիդալ, Մակսվել, Բուսկես, Չավի, Ինիեստա, Պեդրո, Մեսսի, Վիլյա:
Խաղերի ուղիղ հեռարձակումը օնլայն ռեժիմով կարող եք դիտել «Առաջին լրատվականում»: