«Ռունին «Մանչեսթեր Յունայթեդի» պատմության լավագույն խաղացողներից է: Վստահ եմ, որ մարզադաշտը բուռն կերպով կընդունի լեգենդին: Ուեյնն արժանի է դրան: Նա ուշադրության կենտրոնում կլինի թե՛ խաղից առաջ, թե՛ խաղից հետո և թե՛ խաղի ժամանակ»,- Անգլիայի Պրեմիեր լիգայի 5-րդ տուրի «Էվերտոնի» հետ մրցավեճից առաջ ասել է «Մանչեսթեր Յունայթեդի» գլխավոր մարզիչ Ժոզե Մոուրինյոն:
Ամռանը «Յունայթեդի» բոլոր ժամանակների լավագույն ֆուտբոլիստներից մեկը՝ Ուեյն Ռունին, հեռացավ՝ պայմանագիր կնքելով «Էվերտոնի» հետ, և վաղը հայտնի ֆուտբոլիստը կվերադառնա «Օլդ Տրաֆորդ» մարզադաշտ: «Յունայթեդում» Ռունին խաղացել է 13 տարի՝ դառնալով 253 գոլի հեղինակ: Երբ անցյալ տարի Հայաստանի ազգային հավաքականի ավագ Հենրիխ Մխիթարյանը տեղափոխվեց «Մանչեսթեր Յունայթեդ», հպարտության զգացում ունեինք, որ մեր ֆուտբոլիստը խաղալու է կենդանի լեգենդի կողքին: Մխիթարյանի՝ Անգլիա տեղափոխվելուց ընդամենը մեկ տարի անց լեգենդը հեռացավ:
Վերջին շրջանում «Մանչեսթեր Յունայթեդում» ենթահարձակվողի՝ 10 համարի դիրքում խաղում է Մխիթարյանը: Նշենք, որ Ռունին «Յունայթեդի» այն բացառիկ խաղացողներից էր, որ չէր զլանում օգնել, քաջալերել Մխիթարյանին: Հարցազրույցներից մեկում Մխիթարյանը նշել էր, որ Ռունին առանձնակի վերաբերմունք է ցույց տալիս թիմի նորեկներին, սովորեցնում ֆուտբոլային կարևոր դետալներ: Ռունին գիտակցում էր, որ Մխիթարյանը հավակնում է իրեն դուրս թողնել մեկնարկային կազմից: Ֆուտբոլային բարձր պրոֆեսիոնալիզմն ու մարդկային բարձր որակները Ռունիին օգնեցին պատվով հեռանալ «Յունայթեդից», հեռանալ որպես լեգենդ:
Ու հիմա Մխիթարյանը, ըստ ամենայնի՝ Ռունիի խաղային դիրքում, կխաղա կենդանի լեգենդի դեմ: Անգլիացի շատ վերլուծաբաններ, ֆուտբոլիստներ, երկրպագուներ այն կարծիքին են, որ հենց Մխիթարյանը վերջ դրեց Ռունիի կարիերային «Մանչեսթեր Յունայթեդում»:
Ինչևէ, վաղը կայանալիք մրցավեճում մեծ կլինի Մխիթարյանի դերը: Վնասվածքի պատճառով «Էվերտոնի» դեմ մրցավեճը բաց կթողնի կենտրոնական կիսապաշտպան Պոլ Պոգբան: Նրա հավանական փոխարինողներն են Անդեր Էրերան և Մարուան Ֆելաինին: Չի բացառվում, որ վաղը կենտրոնում տեսնենք նաև թիմի ավագ Մայքլ Կարիկին:
Ինչ խոսք, Պոգբայի բացակայությունը մեծ կորուստ է «Մանչեսթեր Յունայթեդի» համար: Այդուհանդերձ, Ֆրանսիայի ազգային հավաքականի կիսապաշտպանի բացակայության պարագայում ազատ տեղաշարժվելու հնարավորություն է ստանում Մխիթարյանը, ինչի արդյունքում «Յունայթեդի» գրոհներն ավելի արագ և դինամիկ ընթացք են ստանում: Ապացույցը Չեմպիոնների լիգայի խաղարկության խմբային փուլի առաջին տուրի «Բազելի» հետ հանդիպումն էր: Առաջին կեսում Պոգբայի՝ խաղադաշտը լքելուց հետո դաշտի կենտրոնական հատվածում խաղն իր վրա վերցրեց հայ ֆուտբոլիստը՝ նպաստելով «Յունայթեդի» արագ և արդյունավետ խաղին:
Այդուհանդերձ, հաշվի առնելով այն, որ «Մանչեսթեր Յունայթեդը» խաղալու է սեփական հարկի տակ, պետք չէ բացառել, որ Մոուրինյոն կպայքարի 4-3-3 խաղային դասավորությամբ: Այս պարագայում կենտրոնական հարձակվողի դիրքում կլինի Լուկակուն, իսկ եզրերից կգործեն Մխիթարյանը և հավանաբար Մարկուս Ռեշֆորդը: Կիսապաշտպանության կենտրոնում էլ կխաղան Ֆելաինին, Էրերան, իսկ հենակետայինի դիրքում կլինի Մատիչը:
Նշենք, որ Անգլիայում պինդ թիմի համբավ ունեցող «Էվերտոնն» ընթացիկ առաջնությունում այնքան էլ հաջող չի մեկնարկել: 4 հանդիպումներում «Էվերտոնը» մեկ հաղթանակ է տարել, մեկ հանդիպում ավարտել ոչ-ոքի և կրել երկու պարտություն: «Մանչեսթեր Յունայթեդի» մրցակիցն այս պահին 16-րդ հորիզոնականում է գտնվում: Անցյալ տարի Էվերտոնը Պրեմիեր լիգան ավարտել էր «Մանչեսթեր Յունայթեդի» հարևանությամբ՝ զբաղեցնելով 7-րդ հորիզոնականը: «Էվերտոնն» անհաջող է մեկնարկել նաև Եվրոպա լիգայի խաղարկության խմբային փուլում: Առաջին մրցավեճում անգլիական թիմը հյուրընկալվելիս 3:0 հաշվով զիջել է իտալական «Ատլանտային»:
Բուքմեյքերական ընկերությունները վաղվա խաղում բացահայտ ֆավորիտ են համարում «Յունայթեդին»՝ վերջինիս հաղթանակը գնահատալով 1.35 գործակցով: Ոչ-ոքիի համար սահմանված է 5, իսկ «Էվերտոնի» հաղթանակի համար՝ 9.2 գործակից: «Մանչեսթեր Յունայթեդ»-«Էվերտոն» հանդիպումը կսկսվի Երևանի ժամանակով 19-ին: