«Մանչեսթեր Յունայթեդի» կիսապաշտպան Հենրիխ Մխիթարյանը հայտարարել է, որ զարմացած է, թե ինչպես է «Չելսին» համաձայնվել առանցքային Նեմենա Մատիչին վաճառել «Մանչեսթեր Յունայթեդին»: Ի դեպ «Չելսիի» գլխավոր մարզիչ Անտոնիո Կոնտեն իր հերթին համարում է, որ 29-ամյա ֆուտբոլիստի հեռանալը մեծ կորուստ է Լոնդոնյան ակումբի համար։ Մխիթարյանի խոսքով Մատիչի տրանսֆերը մեծ ձեռքբերում է:
«Իրականում զարմացած եմ, սակայն միևնույն ժամանակ շատ ուրախ եմ, որ «Մանչեսթերը ձեռք բերեց նրան։ Ուզում եմ նաև անդրադառնալ թիմի մյուս երկու նորեկներին՝ Վիկտոր Լինդելոֆին և Ռոմելու Լուկակուին: Նրանք շատ լավ խաղացողներ են, ավելին՝ նրանք տիպիկ «Մանչեսթեր Յունայթեդի» խաղացողներ են»,- ասել է Մխիթարյանը։ Վերջինի համոզմամբ Մատիչը մեծ աշխատանք է կատարում դաշտում։ «Մատիչը փորձում է կոտրել բոլոր գրոհները, իսկ Լուկակուն խփում է իր գոլերը: Լինդելոֆն էլ արդեն իսկ կարողանում է ցույց տալ իր ուժերը պաշտպանության կենտրոնում։ Փաստ է, որ ակումբը լավ գործարքներ է կնքել: Նորեկները մեզ շատ կօգնեն»,- հավելել է Մխիթարյանը։
Մեր ֆուտբոլիստն անդրադարձել է նաև «Վեսթ Հեմի» հետ հանդիպմանը, որում գործեց ենթահարձակվողի դերում:
«Ես նախընտրում եմ խաղալ 10 համարի դիրքում, բայց եթե մարզիչը կարծում է, որ ես թիմին ավելի շատ օգուտ եմ բերում խաղալով եզրերում: Ամեն դեպքում հարգում եմ մարզչի կարծիքը: «Վեսթ-Հեմին» հաղթելը մեծ հաջողություն էր մեզ համար, քանզի հակառակորդը ուժեղ էր: Մրցաշրջանի սկիզբը հաջող էր, պետք է շարունակենք նույն կերպ», – ասել է Մխիթարյանը։
Նշենք, որ «Վեսթ Հեմի» հետ հանդիպումը 2006 թվականից հետո «Յունայթեդի» համար լավագույն մեկնարկն էր Պրեմիեր լիգայում: 11 տարի առաջ Պրեմիեր լիգայի մեկնարկային տուրում «Յունայթեդը» 5:1 հաշվով ջախջախել էր «Ֆուլհեմին»։
«Որպես թիմի անդամ կարող եմ ասել, որ ակումբն ունեցել է հաջողություններ և կորուստներ, սակայն վերջին մի քանի տարիները «Յունայթեդի» համար անհաջող են եղել: Հուսով եմ, որ այս տարի մեր թիմը լուրջ հաջողություններ կունենա։ Մենք կփորձենք ամեն ինչ անել, որպեսզի ակումբը տեղափոխվի այն մակարդակին, որը նախկինում եղել է: Դժվար է, բայց մենք կփորձենք ամեն ինչ անել»,- ասել է Մխիթարյանը: