Ֆուտբոլի Հայաստանի երիտասարդական հավաքականը հաղթանակով սկսեց 2019 թվականի Եվրոպայի առաջնության ընտրական փուլը: Մեր ֆուտբոլիստները հյուրընկալվելիս 3:0 հաշվով առավելության հասան Ջիբրալթարի հավաքականի նկատմամբ:
Ինչ խոսք, հաղթանակը ոգևորություն և դրական լիցքեր է հաղորդում թե՛ ֆուտբոլիստներին և թե՛ երկրպագուներին: Ուրախալի է, որ ազգային հավաքականի՝ Մոնտենեգրոյից կրած խայտառակ պարտությունից հետո մեր երիտասարդական թիմը երեք միավոր վաստակեց, ինչի համար շնորհավորում ենք ֆուտբոլիստներին և գլխավոր մարզիչ Արթուր Ոսկանյանին:
Մեր հավաքականի հաղթանակը ՀՖՖ-ն որակել է ջախջախիչ: Մասնավորապես, ՀՖՖ-ի պաշտոնական կայքում Ջիբրալթար-Հայաստան հանդիպման մասին պատմող հոդվածը վերնագրված է՝ «Հայաստանի Մ-21 հավաքականը ջախջախեց Ջիբրալթարին»:
Ի՞նչ ասել է՝ ջախջախեց: 3:0 հաշվով հաղթանակը ջախջախի՞չ է: Ո՞ւմ է ջախջախել Հայաստանի հավաքականը: Սովորաբար ջախջախիչ են որակվում 5:0, 6:0 հաշվով տարած հաղթանակները: Ջախջախիչ կարելի է համարել, օրինակ, 2012 թվականի ֆուտբոլի Եվրոպայի առաջնության եզրափակչում Իսպանիայի 4:0 հաշվով տարած հաղթանակը Իտալիայի նկատմամբ: Ջախջախիչ, քանզի մրցակիցները կարգով գրեթե հավասար էին, և իտալացիների ձախողումն իսկապես ջախջախիչ էր:
Հիմա եկեք հասկանանք՝ ում է ջախջախել Հայաստանի երիտասարդական հավաքականը: Ջիբրալթարի ֆուտբոլի ասոցիացիան ՈՒԵՖԱ-ի անդամ է դարձել 2013 թվականի մայիսին, իսկ ՖԻՖԱ-ի անդամ՝ 2016 թվականի մայիսին: Ջիբրալթարի երիտասարդական հավաքականն առաջին հանդիպումն անցկացրել է 6 օր առաջ՝ հունիսի 8-ին, ընտրական փուլի շրջանակներում 3:0 հաշվով զիջելով Ավստրիայի ընտրանուն: Հայաստանի հավաքականի հետ հանդիպումը երկրորդն էր Ջիբրալթարի երիտասարդական հավաքականի պատմության մեջ: Այս հավաքականի խաղացողների 80 տոկոսը Ջիբրալթարի կիսասիրողական թիմերը ներկայացնող երիտասարդներ և պատանիներ են:
Կարծում ենք՝ մեկնաբանություններն ավելորդ են: Նման հավաքականի նկատմամբ պարզապես խոշոր հաշվով տարած հաղթանակը ջախջախիչ անվանելով՝ Ռուբեն Հայրապետյանի գլխավորած ՀՖՖ-ն, այսպես ասած, թոզ է փչում ֆուտբոլասերների աչքերին՝ փորձելով ցույց տալ, որ լավ հավաքական ունենք և նույնիսկ հաղթում ենք: Եթե ՀՖՖ-ի մասնագետների համար 3:0 հաշիվը ջախջախիչ է, ապա ինչո՞ւ էին նրանք Մոնտենեգրոյից կրած 4:1 հաշվով տապալումն ուղղակի որակել՝ «Հայաստանի հավաքականը պարտվեց Մոնտենեգրոյին»:
2016 թվականի հոկտեմբերին Հայաստանի ազգային հավաքականը Երևանում 0:5 ջախջախիչ հաշվով զիջեց Ռումինիային: Ջախջախիչ պարտության ավելի լավ օրինակ դժվար է պատկերացնել, սակայն ՀՖՖ-ն իր կայքում անդրադառնալով այս հանդիպմանը՝ նույնիսկ չէր նշել, որ մերոնք պարտվել են խոշոր հաշվով՝ հոդվածը վերնագրելով «Հայաստանի հավաքականը պարտվեց Ռումինիային»: Եթե ունեք պարտությունների և ջախջախումների չափորոշիչներ, ապա պահպանեք դրանք:
Ունենալով ավերված ֆուտբոլ և ֆուտբոլայի կառավարման բռնատիրական համակարգ՝ հաղթանակների նման որակավորումներն ուղղակի ծիծաղելի են: Ֆուտբոլասերներից շատերը հավանաբար չեն դիտել Ջիբրալթար-Հայաստան հանդիպումը: Հանդիպման ինտերնետային հեռարձակմանը հետևած ֆուտբոլասերները կհամաձայնեն, որ այդ հանդիպումը իրականում «անտիֆուտբոլ» էր:
«Սպասում էինք, որ դժվար խաղ է լինելու, քանի որ ուսումնասիրել էինք Ջիբրալթարի հավաքականին Ավստրիայի հետ խաղում։ Ամբողջ թիմով պաշտպանվում էին և ազատ գոտիներ չէին թողնում։ Ըստ այդմ, տղաներին ասել էինք, որ համբերատար լինեն, սպասեն հարմար պահերի և օգտվեն դրանցից։ Շատ լավ է, որ կարողացան արագ գոլ խփել և վստահ անցկացրին հանդիպումը։ Ինձ դուր եկավ, որ ամբողջ խաղի ընթացքում տղաները խաղացին անմնացորդ նվիրվածությամբ և կատարեցին իրենց աշխատանքը։ Ինձ համար դա ամենակարևորն է։ Իհարկե, սխալներ և բացթողումներ եղան, բայց դա ժամանակի հարց է, նոր թիմ է ստեղծվել, և ժամանակի ընթացքում այդ ամենը կուղղենք»,- խաղից հետո ասել է Հայաստանի հավաքականի գլխավոր մարզիչ Արթուր Ոսկանյանը:
Հայաստանի հավաքականը հաջորդ հանդիպումն անցկացնելու է օգոստոսի 31-ին՝ մրցակցի հարկի տակ մրցելով Ռուսաստանի հավաքականի հետ: Վերջինին 3:0 հաշվով հաղթելու դեպքում կարելի կլիներ ասել՝ մերոնք ջախջախեցին ռուսներին, քանզի այս հավաքականը կարգով մի քանի անգամ ավելի բարձր է:
