Անգլիայի Պրեմիեր լիգայի 30-րդ տուրում «Մանչեսթեր Յունայթեդին» չհաջողվեց սեփական հարկի տակ հաղթել «Վեսթ Բրոմվիչին»: Ունենալով հսկայական առավելություն` դաշտի տերերին չէր հաջողվում իրական գոլային պահեր ստեղծել:
Նշենք, որ «Յունայթեդի» հիմնական կազմից այս հանդիպումը տարբեր պատճառներով բաց թողեցին վեց ֆուտբոլիստներ, պաշպաններ` Սմոլինգը, Ջոնսը, կիսապաշտպաններ Էրերան, Պոգբան, Մատան, ինչպես նաև առաջատար հարձակվող Իբրահիմովիչը:
Նշենք, որ Մատան վիրահատության է ենթարկվել և հնարավոր է ընթացիկ մրցաշրջանում նրան այլևս չտեսնենք խաղադաշտում: Սպասվածի համաձայն` կենտրոնական հարձակվողի պարտականությունը Մոուրինյոն վստահել էր Մարկուս Ռեշֆորդին: Հնարավոր է շատերը չհամաձայնվեն, բայց կարծում ենք Ռեշֆորդը «Յունայթեդի» թերևս ամենաթույլ և ոչ կրեատիվ հարձակվողն է: Այս մրցավեճում ևս նրա գործողությունների 80 տոկոսը խոտան էր:
Բացի արագ վազելուց հարձակվողը պետք է ունենա նաև մտածելու ունակություն: Ռեշֆորդի մտահորիզոնը թույլ չի տալիս կարդալու խաղընկերների հնարավոր գործողությունները և հայտնվել հարձակման կրակագծում:
Հերթական անգամ համոզվեցինք, որ «Մանչեսթեր Յունայթեդն» այսօր հարձակվողի պակաս ունի: Իբրահիմովիչի բացակայության պարագայում թիմի գործողությունները դառնում են անատամ և նույնօրինակ: Լինելով ենթահարձակվողի դիրքում` Հայաստանի ազգային հավաքականի ավագ Հենրիխ Մխիթարյանը փորձում էր համագործակցել կենտրոնական հարձակվողի հետ, բայց Ռեշֆորդը մոլորված էր դաշտում: Հանդիպման միակ ռեալ գոլային պահը ստեղծեց հենց Մխիթարյանը` մրցակցի պաշտպանի սխալի արդյունքում:
Ընդհանուր առմամբ «Յունայթեդը» խաղացողների բարձր կարգի շնորհիվ վերահսկում էր հանդիպման ընթացքը: 90 րոպեների ընթացքում դաշտի տերերը կատարեցին մոտ 750 փոխանցում, իսկ գնդակին տիրելու հարաբերությունը՝ 75-25 էր: Ֆուտբոլում հազվադեպ են դեպքերը երբ ֆավորիտը ունենալով նման առավելություն չի կարողանում հաջողության հասել և գոնե մեկ գոլ խփել: Երկրորդ կեսի վերջնամասում Մոուրինյոն փոխարինեց Մխիթարյանին ասպարեզ դուրս բերելով Ուեյն Ռունիին: Թե ինչու Մոուրինյոն չփոխարինեց բավական թույլ խաղ ցուցադող աջ կիսապաշտպան Լինգարդին, դժվար է ասել: Մխիթարյանը տեղափոխվելով աջ եզր կարծում ենք կմեծացներ ճնշումը:
Բազմիցս ենք տեսել, թե ինչպես են Ռունին և Մխիթարյանը համագործացում: Թե Ռունին, և թե Մխիթարյանը ստեղծագործող ֆուտբոլիստներ են: Նրանց ներկայությունը խաղադաշտում կարող էր ստիպել մրցակցի պաշտպանների սխալներ թույլ տալ:
Ինչ խոսք «Մանչեսթեր Յունայթեդը» կադրային լուրջ խնդիրներ ունի, բայց այս արդյունքի գլխավոր մեղավորը կարծում ենք թիմի գլխավոր մարզիչն է: Լինելով թելադրողի դերում «Յունաթեդի» ֆուտբոլիստները չունեին Բ տարբերակը դարպասին սպառնալու: Բավական քիչ էին հեռվից հարվածները: Երբ մրցակիցն անցնում է խուլ պաշտպանության հարձակվող թիմի համար հեռվից հարվածները հաջողության հասնելու հիմանական միջոցներից մեկը պետք է դառնա: Դաշտի տերերը փորձում էին եզրերից կատարած բարձր փոխանցումներով սպառնալ դարպասին, բայց Իբրահիմովիչի բացակության պարագայում մրցակցի պաշտպաններն առանց ճիգեր գործադրելու չեզոքացնում էին վտանգը:
«Վեսթ Բրոմվիչը» հենց հանդիպման սկզբից անցնելով ամուր պաշտպանության հասավ իր նպատակին: Այս ոչ-ոքին «Մանչեսթեր Յունաթեդի» համար էլ ավելի բարձրացրեց խնդիրը մրցաշարային աղյուսակի առաջին քառյակի համար պայքարելու:
Ընթացիկ առաջնությունում Ժոզե Մոուրինյոյի գլխավորած թիմն յուրօրինակ ռեկորդ է սահմանել 12 հանդիպում ավարտելով ոչ-ոքի: Ընդամենը երեք օր հետո Անգլիայի Պրեմիեր Լիգայի 31-րդ տուրում սեփական հարկի տակ մրցելու է «Էվերթոնի» հետ: Վերջինս այս պահին 7-րդ հորիզոնականում է գտնվում և աչքի է ընկնում դինամիկ և կայուն խաղով:
