Մինսկի «Դինամո»-ի և Հայաստանի ազգային հավաքականի կիսապաշտպան Արթուր Եդիգարյանը Offside.by-ի լրագրողին տված հարցազրույցում խոսել է իր ներկայիս թիմի և Դորտմունդի «Բորուսիա»-ի կիսապաշտպան Հենրիխ Մխիթարյանի հետ նմանության մասին:
– Արթուր, ինչպե՞ս հայտնվեցիր Բելառուսում:
– «Դինամո»-ն իմ ծառայություններով սկսել էր հետաքրքրվել դեռ դեկտեմբերին, որից հետո ակումբի ներկայացուցիչներն ինձ հետ հեռախոսազանգ ունեցան: Նշեցին, որ ցանկանում են ինձ տեսնել «Դինամո»-ի կազմում: Գիտեի, որ «Դինամո»-ն վատ ակումբ չէ: Այդ ժամանակ ես հանդես էի գալիս «Կայրաթ»-ում: Ինձ դուր եկավ այն փաստը, որ Բելառուսական բրենդային ակումբը հետաքրքրված էր իմ ծառայություններով: Այդ իսկ պատճառով տվեցի իմ համաձայնությունը: Տեղյակ էի, որ թիմն անցյալ մրցաշրջանում հիանալի հանդիպումներ է անցկացրել, առաջին անգամ հանդես է եկել Եվրոպայի Լիգայում և դարձել տեղի առաջնության փոխչեմպիոն: Կարող էին նաև չեմպիոն դառնալ: Ինձ հետաքրքրեց «Դինամո»-ն և Բելառուսի առաջնությունը: Բացի այդ, իմ գործող պայմանագրի ժամկետը «Կայրաթ»-ի հետ մոտենում էր ավարտին:
– Չէի՞ր անհանգստանում, որ կարող ես մինչև ընթացիկ մրցաշրջանի ավարտն առանց ակումբի մնալ:
– Ոչ: Ես ընտրելու բազում տարբերակներ ունեի, սակայն որոշեցի ընտրել «Դինամո»-ն: Ինձ գերեց թիմի նպատակասլացությունը, քանի որ մինսկյան ակումբի ֆուտբոլիստները ցանկանում էին չեմպիոն դառնալ: Միշտ էլ երազել եմ հանդես գալ այսպիսի ակումբում, որտեղ թիմն իր առջև դժվար խնդիրներ է դնում:
– Քո փորձաշրջանը «Դինամո»-ում տևեց մոտ մեկ ամիս: Դա քեզ չէ՞ր անհանգստացնում:
– Ոչ, քանի որ բոլոր ակումբներում, որտեղ ես հանդես եմ եկել, սկզբում փորձաշրջան եմ անցկացրել: Փորձաշրջանները միշտ հաջող էին անցնում: Ինձ այդպիսի բաները չեն անհանգստացնում: Իհարկե, ես հասկանում էի, որ ֆուտբոլում ամեն ինչ կարող է լինել, սակայն ամեն ինչ կախված էր լինում միայն ինձնից: Եթե ամեն ինչ կարգին է լինում, ապա մարզիչը միանգամից տեսնում է, թե դու ինչ մակարդակի ֆուտբոլիստ ես:
– Հետևե՞լ ես «Դինամո»-ի հանդիպումներին համացանցում:
– Այո: Անցյալ տարի, երբ թիմն ավարտում էր ելույթները Եվրոպայի Լիգայում, դիտեցի «Ֆիորենտինա»-ի դեմ հանդիպումը: Բացի այդ դիտել եմ Բելառուսի առաջնության այլ հանդիպումներ: Նախկինում Ձեր երկրում հանդես էին գալիս իմ հայրենակիցներ Հովհաննես Գոհարյանը և Զավեն Բադոյանը:
– Ծանո՞թ ես նրանց հետ:
– Մենք միասին հանդես ենք եկել Հայաստանի ազգային հավաքականում: Խոսել եմ նրանց հետ և Բելառուսի առաջնության հետ կապված հարցեր տվել: Պատմել էին, որ մրցաշարը դժվար է միայն նրա համար, քանի որ առաջնության բոլոր թիմերը ֆիզիկապես լավ էին պատրաստված: Պատմել էին նաև, որ ԲԱՏԷ-ն, «Դինամո»-ն և «Շախտյոր»-ը լավագույն թիմերն են այս երկրում:
– Հանդես ես եկել Ղազախստանի առաջնությունում: Ի՞նչ ես կարծում, ո՞վ կկարողանար ավելի լավ հարմարվել այդ առաջնությանը:
– Կարծում եմ, որ հայերը: Քանի որ մեր երկրները նմանություններ ունեն, ղազախը և հայը տաքարյուն են: Այստեղ բոլորը հանգիստ են, և դա ինձ դուր է գալիս: Առօրյա կյանքում ես նույնպես հանգիստ եմ: Հնարավոր է` խաղադաշտում ես ավելի զգացմունքային եմ: Խաղից հետո կարող եմ մոտենալ մրցակցին և ներողություն խնդրել իմ պահվածքի համար: Սա ֆուտբոլ է, որտեղ ամեն ինչ հնարավոր է:
– Սիրո՞ւմ ես գրազ գալ:
– Շատ եմ սիրում «Բարսելոնա» ակումբը: Երբ նրանք խաղում են «Ռեալ»-ի հետ, ապա ես կարող եմ գրազ գալ ինչ-որ մեկի հետ: Իմ ընկերը` Հենրիխ Մխիթարյանը նույնպես հանգիստ մարդ է: Մանկությունս անցկացրել եմ նրա հետ, հանդես եմ եկել նրա հետ նույն թիմում: Երբ նա տեղափոխվեց Ուկրաինա, ես տեղափոխվեցի Իրան:
– Շփվո՞ւմ եք նրա հետ:
– Իհարկե, «սկայպ»-ի և «վայբեր»-ի միջոցով:
– Նա Ձեզ չի՞ հրավիրել Գերմանիա:
– Դեռ ոչ, քանի որ դեռ ազատ ժամանակ չենք ունեցել:
