Հայաստանի ազգային հավաքականի հարձակվող Յուրա Մովսիսյանն ՈւԵՖԱ-ի պաշտոնական կայքի հետ զրույցում կարևորել է Ալբանիայի ընտրանու հետ առաջիկա մրցավեճը:
«Այլ ելք չունենք: Ալբանացիների հետ խաղը կա՛մ կպահպանի հույսերը, կա՛մ խաչ կքաշի հեռանկարների վրա: Կարող ենք արդյունքի հասնել, բայց դրա համար պետք է մեր լավագույն որակները դրսևորենք: Դա վերաբերում է թե՛ բոլոր ֆուտբոլիստներին անհատապես, թե՛ թիմին՝ ընդհանուր առմամբ:
Այո, այս ընտրական փուլում առայժմ խնդիրներ ունենք կապված արդյունավետության հետ, բայց դա միայն հարձակվողների մեղավորությունը չէ: Ֆուտբոլը կոլեկտիվ խաղ է: Եթե գոլ ենք խփել, դա արել ենք թիմային գործողությունների շնորհիվ:
Իհարկե, հարձակվողները, տվյալ դեպքում ես, պետք է սուր խաղամ: Բայց պետք չէ մոռանալ, որ հարձակվողը կախվածության մեջ գտնվող խաղացող է: Ժամանակակից ֆուտբոլում դժվար է գոլ խփել, եթե գնդակը չես ստացել անհրաժեշտ պահին:
Մեզ մոտ ոչ ոք գոլ չի խփել՝ շրջանցելով մրցակցի 10 խաղացողների, բայց գոլ խփել ենք թիմային գործողությունների շնորհիվ»,- հայտարարել է Մովսիսյանը:
