«Առաջին լրատվական»-ի և «Ա1+»-ի հարցերին պատասխանում է Ազգային ժողովի նախագահ Գալուստ Սահակյանը:
– Պարոն Սահակյան, ինչպե՞ս եք գնահատում ոչ իշխանական եռյակի՝ հոկտեմբերի 10-ի հանրահավաքը և հոկտեմբերի 24-ի հանրահավաքից չունե՞ք մտահոգություն, քանի որ այն, եռյակի ներկայացմամբ, որոշիչ է լինելու:
– Հանրահավաքում տարբեր քաղաքական ուժեր տարբեր մեկնություններ էին անում և տարբեր ուղղություններ որդեգրոմ:
– Չե՞ք պատրաստվում քննարկումների նստել եռյակի հետ: Ճիշտ է, նրանք հայտարարել են, որ իշխանություններին առաջարկություններ չունեն, չունեն նաև ակնկալիքներ, բայց չեն բացառում, որ եթե առաջարկություններ անեք՝ քննարկեն:
– Իրենք այդ մասին են խոսում՝ իրենց մեծարելով, որովհետև իրենց կողմից այդ հարցում որևէ քաղաքական տագնապ կամ խնդիր, որևիցե կողմնորոշում ընդգծված ձևով չի արտահայտվել, և ես չեմ էլ տեսնում, որ քաղաքական որևէ պայման կա: Միտինգը քաղաքական գործունեություն է, բայց դա չի նշանակում, որ եթե կարողանաս որոշակի քանակով ժողովուրդ հավաքել, պիտի գաս ու ինձ հետ բանակցես: Կարծում եմ, որ նման խնդիր չկա:
– Մտահոգություն չունե՞ք հետագա զարգացումներից՝ հատկապես, որ ոչ իշխանական ուժերի հանրահավաքին եկել էին բավականին մեծ թվով մարդիկ, ովքեր նույնպես փոփոխություններ և իշխանափոխություն էին պահանջում:
– Մենք ամեն ինչ արել էինք, որ որևէ խոչընդոտ չլինի, և այդ պայմաններում կարծում եմ՝ երևի չորս-հինգ անգամ ավելի զանգված կհավաքվեր, եթե մտածեինք, թե այն հարցերը, որոնք առաջարկում էր քառյակը, իրոք ժողովրդին ոտքի պիտի հաներ:
– Այնտեղ հավաքված ժողովուրդը նույնպես իշխանափոխություն էր պահանջում:
– Ես չհասկացա, որ ժողովուրդն է պահանջում, առանձին քաղաքական ուժերն են իշխանափոխություն պահանջում:
– Ժողովուրդն ակտիվորեն արձագանքում էր:
– Ցանկացած մարդ կարող է ասել իշխանափոխություն, բայց պիտի հաշվի առնի և ռեզերվները, և քաղաքական պայմանները, և եղած իրավիճակը:
– Բայց նրանք ունեն այդ ռեզերվներն էլ, քաղաքական պայմաններն էլ:
– Ես չեմ կարծում, որ ունեն:
– Ունեն ֆինանսական հնարավորություններ, իսկ ժողովուրդն էլ նրանց կոչով հավաքվում է հանրահավաքներին ու իշխանափոխություն պահանջում: Իշխանափոխություն իրականացնելու համար դա բավականին լուրջ ռեզերվ է: Կան նաև իշխանություններին ուղղված 12 պահանջներ:
– Եթե հարց ուղղեիք՝ ինչպես ես, այնպես էլ միտինգի մասնակիցներից որևէ մեկն այդ 12 պահանջներից չէր ասի: Այդ 12 պահանջների մեջ իշխանափոխություն հաստատ չկար:
– Կարծես թե իշխանափոխության անուղղակի պահանջ կար, որը վերաբերում էր ընտրություններից հետո ընտրողների ցուցակի հրապարակմանը:
– Եթե ժամանակից շուտ իշխանության ձգտողներ կան, ուրեմն կլինեն նաև իշխանափոխության կոչեր: Բայց դա չի նշանակում, որ դա իրավաբանական այն սանդղակն է, որ հենց առաջարկեցին, իշխանությունները դրանով պետք է փոխվեն: Այն հզորությունները, որոնց տիրապետում է ընդդիմությունը, և այն քաղաքական գործընթացները, որոնք Հայաստանում են կատարվում, իրար հակակշռում են: