«Առաջին լրատվական»-ի տեղեկություններով՝ երեկ Իտալիայի նախագահ Ջորջո Նապոլիտանոյի կողմից Գագիկ Ծառուկյանին շնորհված «Ասպետական հրամանատարի» շքանշանը, որը նա երեկ, մարմինը կիպ գրկող, արդեն հայտնի կարմիր «մայկայով» պճնված, ստացավ Իտալիայի դեսպան Ջովաննի Ռիչուլի ձեռքից, նրա համար «կպցրել է» Ծառուկյանի հետ մտերիմ հարաբերություններ ունեցող, Իտալիայում քրեական հեղինակություն, հանցագործ աշխարհում հայտնի Արթուր Ասատրյանը՝ դոն Պիպոն:
Նշենք, որ Ծառուկյանը պարգևատրվեց Իտալական Հանրապետությանը մատուցած ծառայությունների համար: Բայց թե հատկապես ինչ ծառայություններ են մատուցվել Ծառուկյանի կողմից Իտալիայի Հանրապետությանը, որոնք արժանի կլինեին «Ասպետական հրամանատարի» շքանշան ստանալուն՝ այդպես էլ պարզ չէ: Այն մաքսիմում կարող էր այլընտրանքային ճանապարհով «ձեռք բերվել»: Այս դեպքում՝ քրեական ծագում ունենալ:
Նշենք, որ Ծառուկյանի և դոն Պիպոյի հարաբերությունների մասին մամուլում շատ է գրվել: Հենց անցած տարի՝ 2013 թվականին, նրանք Ամանորը միասին Նիցայում են անցկացրել:
Դոն Պիպոն ծնունդով Էջմիածին քաղաքից է: Անցած տարի էլ նրա թիկնապահները բերման էին ենթարկվել Էջմիածնի ոստիկանության կողմից, քանի որ տարիներ առաջ պատճառ էին դարձել սպանության համար: Մի միջադեպից հետո հենց քաղաքի կենտրոնում օրը ցերեկով տեղի էր ունեցել փոխհրաձգություն, ինչի հետևանքով զոհվել էր պատահական մի անցորդ: Դոն Պիպոյին, սակայն, հաջողվել էր իր թիկնապահներին ազատ արձակել և հեռանալ Իտալիա, որտեղից անցած տարի նրան թուլ չէին տվել վերադառնալ Հայաստան:
