ՀՀ վարչապետ Նիկոլ Փաշինյանն մարտի 25-ին այցելել էր Վահագնի թաղամասի, Պռոշյան բնակավայրի ու Աշտարակ համայնքի միջնամասում գտնվող տարածք, որտեղ նախատեսում են ակադեմիական քաղաք կառուցել։ Նա «Ֆեյսբուք» սոցիալական ցանցի ուղիղ եթերում ներկայացրել է, թե ինչ աշխատանքներ են իրականացվելու։
Փաշինյանի խոսքով` Ակադեմիական քաղաքի կառուցումը սկսվելու է «Հայֆիլմի» տարածքից, որտեղ տեղակայվելու է արվեստների կլաստերը։
«Կունենանք ժամանակակից համերգասրահ, որը նախատեսված կլինի նաև կինոդիտումների, օպերայի, թատերական ներկայացումների համար։ Ունիվերսալ բեմ կունենանք»,–ասաց վարչապետը։ Թեմայի շուրջ «Առաջին լրատվական»-ը զրուցել է «Միջմշակութային հետազոտություն և զարգացում» ՀԿ նախագահ նախագահ Արեգ Թադևոսյանի հետ:
Թադևոսյանի խոսքով` ակադեմիական քաղաքի գաղափարը հոյակապ է, բայց դրանով կրթական խնդիրները չեն լուծվում:
Թադևոսյանը կարծում է, որ հիվանդ համակարգը «ռեմոնտ» արած Ակադեմիական քաղաք տեղափոխելով խնդիրները չեն լուծվի. «Բոլոնյան համակարգի համար ևս հսկայական գումար ծախսվեց, բայց այդպես էլ չարդարացրեց իրեն: Մեր միակ փրկությունը կրթության մեջ ինվեստիցիա անելն է»:
