Իրանը չի վախենում իսրայելական հարձակումից: Բոլորին հայտնի է, թե այդ դեպքում ինչ կկատարվի Իսրայելի հետ: Այս մասին հայտարարել է Իրանի նախագահ Մահմուդ Ահմադինեժադը France 24 հեռուստաալիքին տված հարցազրույցում:
Խոսելով Իսլամական Հանրապետության միջուկային ծրագրին վերաբերող բանակցությունների գալիք ռաունդի մասին, որը տեղի կունենա Մոսկվայում, Ահմադինեժադն ասել է, որ այդ հանդիպումից բեկում չի ակնկալում: Միաժամանակ, նա ընդգծել է, որ Իրանը մտադիր է «լավ առաջարկություններ» անել, որպեսզի սկսի աշխատանքը և շարժվի անհրաժեշտ ուղղությամբ:
Ահամդինեժադը հայտարարել է նաև, որ ուրանի մինչև 20 տոկոս հարստացումը համարում է իր ժողովրդի օրինական իրավունքը. «Միջազգային կանոնների համաձայն՝ մինչև 20 % հարստացումը մեր իրավունքն է: Խոսքը միջուկային զենք ստեղծելու քայլի մասին չէ»։
Հիշեցնենք, որ ավելի վաղ միջազգային գործակալությունները հրապարակել էին ԱՄՆ ազգային անվտանգության ինստիտուտի ներկայացուցիչների գնահատականը, որի համաձայն՝ Իրանը զգալիորեն ակտիվացրել է ցածր հարստացված ուրանի արտադրությունը, և արտադրված վառելիքի ընդհանուր ծավալը բավարար է առնվազն 5 միջուկային ռումբ ստեղծելու համար:
Նման եզրակացություններ գիտնականներն արել են ԱԷՄԳ-ի եռամսյակային հաշվետվությունների հիման վրա: Այդ հաշվետվության մեջ նշվում է, որ Իրանն ուրանի հարստացման գործում առաջ է շարժվում` խախտելով ՄԱԿ–ի բանաձևը, որը Թեհրանին կոչ է անում դադարեցնել միջուկային գործունեությունը:
