Ռուսաստանի հավաքականի և Մոսկվայի «Սպարտակ»-ի նախկին ֆուտբոլիստ Եգոր Տիտովը «Եվրո-2012»-ի ընտրական փուլի Սլովակիա-Ռուսաստան հանդիպման նախօրեին sportbox.ru-ին տված հարցազրույցում անդրադարձել է նաև Հայաստանի հավաքականին՝ նշելով, որ հայերի համար Մակեդոնիային հաղթելը բարդ խնդիր չէ:
– Մեկ ամիս առաջ Սլովակիայի հավաքականը 0:4 հաշվով ջախջախիչ պարտություն կրեց Հայաստանից: Դա նշանակո՞ւմ է, որ մեր առաջիկա մրցակիցն անցյալ տարվա համեմատ թուլացել է:
– Ոչ, դա խոսում է այն մասին, որ Հայաստանի հավաքականն է գնալով ուժեղանում: Այսօր Հայաստանն արդեն այն թիմը չէ, որին 10 տարի առաջ մենք «մեկ ոտքով» հաղթեցինք: Հայաստանի հավաքականը մրցակից է, որի հետ բոլորը պետք է հաշվի նստեն: Հայերը կարգով չեն զիջում սլովակներին և արժանի հաղթանակ տարան:
– Հայաստանի հավաքականն ի զորո՞ւ է «Եվրո-2012»-ի ուղեգիր նվաճել:
– Վստահ եմ՝ այո: Կարծում եմ՝ սեփական հարկի տակ նրանք առանց դժվարության կհաղթեն Մակեդոնիային: Հուսով եմ, որ Իռալանդիայի հետ խաղում էլ հայերը դրական արդյունքի կհասնեն: Ես շատ եմ ցանկանում, որ նրանք հայտնվեն «Եվրո-2012»-ում: Այնուամենայնիվ, հայերը մեր եղբայրներն են: Նրանց հավաքականում է խաղում Ռոման Բերեզովսկու նման հիանալի անձնավորությունը, ում հետ ես 2008 թ. խաղացել եմ «Խիմկի»-ի կազմում: Ամբողջ հոգով մաղթում եմ Ռոմանին, ինչպես նաև Սարգիս Հովսեփյանին, որն իր կարիերայի լավագույն տարիները ռուսական ֆուտբոլին է նվիրել, սեփական փորձով հասկանալ՝ ինչ է Եվրոպայի առաջնությունը: