Իսրայելական Cursor Info-ի փոխանցմամբ՝ Ստամբուլի հարյուրավոր բնակիչներ հակաիսրայելական ցույց են կազմակերպել այն հյուրանոցի շրջակայքում, որտեղ տեղավորվել է Թել Ավիվի «Մաքկաբի» ֆուտբոլային ակումբը։ Վերջինս այսօր Եվրալիգայի շրջանակներում ուժերը չափելու է Ստամբուլի «Բեշիքթաշ»-ի հետ։
Նշվում է, որ Թուրքիա ժամանելուն պես իսրայելական ակումբը վերցվել է տեղական ոստիկանության ուժեղացված վերահսկողության տակ։ Օդանավակայանից դեպի հյուրանոց մեկնող իսրայելական ակումբի ավտոբուսին ուղեկցել են 2600 ոստիկաններ։ Ոստիկանության ուժեղացված խմբերը 24 ժամ շարունակ շրջապատած վիճակում են պահում իսրայելցիների տեղավորված հյուրանոցը։
«Մաքկաբի»-ի ֆուտբոլիստներին արգելել են լքել հյուրանոցի տարածքը։ Ցուցարարները հյուրանոցի առջև թափահարել են պաղեստինյան դրոշները և այրել իսրայելական դրոշները։ Մարզումների անցկացման համար իսրայելցի ֆուտբոլիստներին մարզադաշտ են տանում կազմակերպված և ուժեղացված կոնվոյով։ Մարզադաշտը նույնպես պահպանվում է ոստիկանության կողմից։
Բացի այդ, իրենց թիմին աջակցելու համար Ստամբուլ են ժամանել «Մաքկաբի»-ի 300 երկրպագուներ։ Նրանք նույնպես ոստիկանության ուժեղացված հսկողության տակ են։
Խաղից առաջ Թուրքիայի սպորտի նախարարը, ելույթ ունենալով տեղական հեռուստաալիքներից մեկով, հայտարարել է, որ իր երկիրն ամեն ջանք գործադրելու է՝ իսրայելցի ֆուտբոլիստների հանդեպ որևէ սադրանք թույլ չտալու համար. «Խաղից հետո նրանք բոլորը ողջ-առողջ կվերադառնան տուն»։
