Քիչ առաջ ավարտվեց «Եվրո-2012»-ի ընտրական փուլի B խմբի Անդորրա-Հայաստան հանդիպումը: Հայաստանի հավաքականը խոշոր` 0:3 հաշվով հաղթանակ տարավ և վաստակած 11 միավորով ընթանում է 4-րդ տեղում:
Ամբողջ հանդիպումն անցավ Հայաստանի հավաքականի տարածքային և խաղային առավելությամբ: Եթե առաջին խաղակեսի սկզբում մեր տղաների մոտ որոշակի լարվածություն էր նկատվում և փոխանցումների խոտանը շատ էր, ապա 35-րդ րոպեին Մարկոսի խփած գեղեցիկ գոլից հետո Վարդան Մինասյանի սաները սկսեցին շատ ավելի վստահ գործել:
Իսկ 75-րդ րոպեին Գևորգ Ղազարյանի խփած գոլից հետո Հայաստանի հավաքականի հաղթանակն արդեն կասկած չէր հարուցում:
Մրցավարի ավելցրած ժամանակում երրորդ գոլը խփեց մեր հավաքականի առաջատար Հենրիկ Մխիթարյանը, ով անվրեպ իրացրեց Կառլեն Մկրտչյանի վաստակած 11-մետրանոց հարվածը:
Իհարկե մրցակիցը կարգով զիջում էր Հայաստանի հավաքականին և Վարդան Մինասյանին ու նրա սաներին չէր ներվի այլ արդյունքը, սակայն չմոռանանք, որ մեր խմբի առաջատարներներց ոչ մեկին չի հաջողվել խոշոր հաշվով հաղթել Անդորրային:
Ավարտվեց նաև Ռուսաստան-Մակեդոնիա հանդիպումը: Ռուսատանի հավաքականը մեծ դժվարությամբ նվազագույն հաշվով առավելության հասավ մակեդոնացիների նկատմամբ և 16 միավորով ստանձնեց B խմբի առաջատարի դերը: Հանդիպման միակ գոլը 41-րդ րոպեին խփեց Իգոր Սեմշովը:
Իռլանդիա-Սլովակիա հանդիպումը կսկսվի Երևանի ժամանակով 23:45-ին:
