Հունվարի 29-ին մերձմոսկովյան Շելկովո քաղաքում ֆուտզալի Հայաստանի ազգային հավաքականն առաջին հանդիպումը կանցկացնի Եվրոպայի առաջնության որակավորման խմբային փուլում՝ մրցելով Ռուսաստանի ընտրանու հետ։ Վերջինս աշխարհի ուժեղագույն հավաքականների շարքում է և հանդիսանում է Եվրոպայի վերջին առաջնության բրոնզե մեդալակիրը։
«Ամեն տարի մենք ցանկանում ենք, որ ֆուտզալի հավաքականը տարին սկսի դրական առումով: Եվ դրանից հետո մեր բոլոր մյուս հավաքականները շարունակեն հաջողությունը»,- նախօրեին Հայաստանի ազգային հավաքականի ֆուտբոլիստների և մարզչական կազմի հետ հանդիպմանն ասել էր ՀՖՖ նախագահ Արմեն Մելիքբեկյանը։
Վերջինիս՝ խոսքով ֆուտզալի հավաքականը հասել է մի փուլի, որ պայքարում է եվրոպական ուժեղ ընտրանիների հետ: «Հասկանում ենք, թե որքան բարդ խմբում ենք հայտնվել: Բայց հասկանում ենք նաև, որ ունենք այն ներուժը, որ մեզ կօգնի պայքարել: Մեր առջև խնդիր է դրված վաստակել Եվրոպայի առաջնության ուղեգիր, բայց կարևոր խնդիր է նաև նվիրվածությունը: Ֆուտզալի հավաքականը մեզ համար օրինակելի է»,- ասել էր Մելիքբեկյանը:
2020 թվականին Ռուսաստանի ազգային հավաքականը անցկացրել է 3 հանդիպում։ Աշխարհի գավաթի խաղարկության որակավորման փուլում ռուսները 7։1 հաշվով հաղթել են Սլովակիային, 4։3 հաշվով էլ՝ Խորվաթիային։ Միակ պարտությունը մեր առաջիկա մրցակիցը կրել է Ադրբեջանից՝ անսպասելիորեն զիջելով նույն՝ 4։3 հաշվով։ Վաստակելով 6 միավոր՝ Ռուսաստանը ենթախմբում զբաղեցրել է առաջին հորիզոնականը՝ նվաճելով եզրափակիչ փուլի ուղեգիր։ Նույնքան միավոր է վաստակել նաև երկրորդ հորիզոնականը զբաղեցրած Խորվաթիան, որը ևս հաղթահարել է խմբային փուլը։ Իսկ ահա 4 միավորով երրորդ հորիզոնականը զբաղեցրած Ադրբեջանը դուրս է մնացել հետագա պայքարից։
Հիշեցնենք, որ Եվրոպայի առաջնության փլեյ-օֆում դեկտեմբերի 9-ին Բուլղարիայի Վառնա քաղաքի սպորտի և մշակույթի պալատում մեր հավաքականը 3։1 հաշվով հաղթել էր Բուլղարիային։ Փլեյ-օֆի առաջին խաղում էլ մերոնք առավելության էին հասել 4։0 հաշվով։ Նշենք, որ Բուլղարիայի հետ Հայաստանի հավաքականը պետք է տնային հանդիպում անցկացներ Երևանում դեռևս անցյալ տարվա գարնանը, սակայն կորոնավիրուսի համավարակի պատճառով ՈԻԵՖԱ-ն որոշեց, որ երկու հանդիպումներն էլ պետք է կայանան Բուլղարիայում։
Որակավորման խմբային փուլում, բացի Ռուսաստանից, մեր մրցակիցներն են նաև Ֆրանսիայի և Վրաստանի հավաքականները։ Ի դեպ, մեր ենթախմբում արդեն իսկ կայացել է մեկ հանդիպում։ Վրաստանի ընտրանին ոչ-ոքի՝ 4։4 է խաղացել Ֆրանսիայի հետ։ Սա մեզ համար ձեռնտու արդյունք կարելի է համարել։
Որակավորման խմբային փուլում 8 ենթախմբերում առաջին հորիզոնականը զբաղեցրած հավաքականներն իրավունք կստանան մասնակցելու Եվրոպայի առաջնության եզրափակիչ փուլին։ Եզրափակիչ փուլի ուղեգրեր կստանան ենթախմբերում երկրորդ հորիզոնականները զբաղեցրած և լավագույն արդյունք ցույց տված ևս 6 հավաքականներ։ Մյուս երկու հավաքականները փլեյ-օֆում կվիճարկեն ևս մեկ ուղեգիր։ Եվրոպայի առաջնության եզրափակիչ փուլ որակավորման սկզբունքով դուրս կգան 15 հավաքականներ, որոնց կմիանա կազմակերպիչ երկրի ազգային թիմը։
Ռուսաստանի հավաքականի հանդիպումից ընդամենը 5 օր անց՝ փետրվարի 3-ին, Հայաստանի ազգային հավաքականը Երևանում կմրցի Ֆրանսիայի ընտրանու հետ։ Նշենք, որ ֆուտզալի Հայաստանի ազգային հավաքականը երբևէ պաշտոնական հանդիպում չի անցկացրել Երևանում։ Ինչևէ, Բուլղարիայի հետ վճռորոշ հանդիպումներում տեսանք որակապես շատ ավելի լավ հավաքական։ Երկու հանդիպումներում մերոնք խփեցին 7 և բաց թողեցին ընդամենը մեկ գնդակ, այն էլ՝ պաշտպանի վրիպելու հետևանքով։ Փլեյ-օֆում մեկ գնդակ ընդունելը խոսում է բալանսավորված և տակտիկապես լավ պատրաստված թիմի մասին։
Այո, մենք հայտնվել ենք բավական բարդ ենթախմբում, բայց երկրորդ հորիզոնականի համար պայքարելը, կարծում ենք, միանգամայն իրատեսական է։ Հավաքականի ֆուտբոլիստների հետ հանդիպմանն Արմեն Մելիքբեկյանը նշել է, որ ազգային թիմի առաջ խնդիր է դրված նվաճել Եվրոպայի առաջնության եզրափակիչ փուլի ուղեգիր։ Ավելացնենք, որ այս անգամ հավաքական են հրավիրվել աշխարհի ուժեղագույն լիգաներից մեկը՝ Ռուսաստանի սուպերլիգան ներկայացնող երկու ֆուտբոլիստներ՝ Նիկիտա Խրոմիխը՝ Սամարայի «Դինամո» թիմից, և Դենիս Նևեդրովը՝ «Տյումենից»: