Ֆուտբոլի Հայաստանի երիտասարդական հավաքականի կիսապաշտպան Հովհաննես Հարությունյանը, որը դասվում է մեր ամենահեռանկարային ֆուտբոլիստների շարքում մոտ էր Բուլղարիայի բարձրագույն լիգան ներկայացնող Սոֆիայի «Սլավիա» տեղափոխվելուն։
Հարությունյանը, որը հանդես էր գալիս Սլովակիայի բարձրագույն դիվիզիոնի «Զեմպլին Միխալովցե» ակումբում, անցյալ տարվա սեպտեմբերին վերադարձել էր «Արարատ-Արմենիա»։ Վերջինիս գլխավոր մարզիչ Դավիդ Կամպանյան ընթացիկ մրցաշրջանում չգիտես ինչու ՀՀ երիտասարդական հավաքականի կիսապաշտպանին խաղաժամանակ չի տրամարդում։
Հարությունյանի տրանսֆերային հարցերով զբաղվող «Լեգալ սպորտ» ֆուտբոլային գործակալության համահիմնադիր Խորեն Քալաշյանն «Առաջին լրատվական»-ի հետ զրույցում ասաց, որ կիսապաշտպանի բուլղարական ակումբ տեղափոխվելու համար ամեն ինչ պատրաստ է եղել կողմերի միջև ձեռք բերված պայմանավորվածության արդյունքում։ ««Լեգալ Սպորտի» տնօրեն Կարեն Դոխոյանը կապ էր հաստատել «Սլավիայի» գլխավոր մարզիչ Ալեքսանդր Տարխանովի հետ, որը անցյալ տարի գլխավորում էր Երևանի «Փյունիկը»։ Ռուս մասնագետը տվել էր իր համաձայնությունը տրանսֆերի վերաբերյալ։
Պայմանավորվածություն էր ձեռք բերվել նաև բուլղարական ակումբի, «Արարատ-Արմենիայի» և ֆուտբոլիստի միջև։ Վերջին պահին սակայն «Սլավիայից» մեզ հայտնեցին, որ Հովհաննես Հարությունյանին հրավիրում են միայն փորձաշրջան անցնելու։ Մենք բնականաբար հրաժարվեցինք այս տարբերակից, քանզի տեղի ունեցածը պայմանավորվածության խախտում է և ոչ պրոֆեսիոնալ մոտեցում։ Իսկ թե ինչու է բուլղարական ակումբը նման քայլի դիմել դժվարանում եմ ասել»,- նշեց Քալաշյանը։
