Նախօրեին ՀՖՖ-ն կայացրեց, ըստ էության, բեկումային մի որոշում, որը կարող է փոխել հայկական ֆուտբոլի զարգացման վեկտորը։ Մասնավորապես Հայաստանի ֆուտբոլի ֆեդերացիայում կայացել էր հանդիպում ՀՖՖ նախագահ Արմեն Մելիքբեկյանի և Ռաֆայել Նազարյանի միջև, որից հետո կողմերը ստորագրել են համագործակցության երկամյա պայմանագիր:
Ռաֆայել Նազարյանը, սկսած 2019 թվականի օգոստոսից, գլխավորում է ԲԿՄԱ-ն: 45-ամյա մասնագետի մարզչական շտաբում ընդգրկվել են Մհեր Միրումյանը, Գևորգ Պողոսյանը, Արամ Բարեղամյանը և դարպասապահների մարզիչ Նիկոլայ Սարգսյանը: «Հայաստանի Մ-21 հավաքականը գլխավորելը մեծ պատասխանատվություն է ինձ համար: Ժամանակին աշխատել եմ այս տարիքային հավաքականում և լավ եմ պատկերացնում աշխատանքի դրական կողմերը և դժվարությունները: Շվեդիայի և Իսլանդիայի հավաքականների հետ առաջիկա հանդիպումները մեզ համար լավ առիթ է գործի մեջ տեսնելու այն ֆուտբոլիստներին, ում շուրջ ձևավորվելու է ընտրական հաջորդ փուլին մասնակցող հավաքականը: ԲԿՄԱ-ում ամենօրյա ռեժիմով աշխատում եմ թեկնածուներից շատերի հետ: Մեր ուշադրության կենտրոնում են լինելու տարիքային առումով այս հավաքականին համապատասխան բոլոր ֆուտբոլիստներն ինչպես Հայաստանից, այնպես էլ արտերկրից: Վստահ եմ, որ ստեղծելու ենք շատ մարտունակ հավաքական»,- ՀՖՖ պաշտոնական կայքի հետ զրույցում ասել էր Ռաֆայել Նազարյանը: Հիշեցնենք, որ մինչ այս Հայաստանի երիտասարդական հավաքականը գլխավորում էր իսպանացի Անտոնիո Ֆլորեսը։ Նրա գլխավորությամբ մեր հավաքականը Եվրոպայի առաջնության ընտրական փուլի վերջին խաղում հյուրընկալվելիս 10։0 հաշվով զիջել էր Շվեդիային։ Նազարյանի նշանակումն առաջին հայացքից մեր երկրորդ հավաքականում պարզապես մարզչական փոփոխություն է, բայց․․․։
2018 թվականի սկզբին Խինես Մելենդեսին նշանակելով ՀՖՖ-ի տեխնիկական տնօրեն հայկական ֆուտբոլային գերատեսչությունը ներդրեց զարգացման իսպանական մոդելը։ Դրա շրջանակներում էլ 2019 թվականի փետրվարին Ֆլորեսը նշանակվեց Հայաստանի երիտասարդական հավաքականի գլխավոր մարզիչ։ Նշենք, որ Մելենդեսի գործառույթների մեջ է մտնում նաև Հայաստանի բոլոր տարիքային հավաքականների համակարգումը։ Ի՞նչպես կարելի է գնահատել Մելենեսի և Ֆլերոսի աշխատանքը վերջին մեկ երկու տարիներին։ Մեր երիտասարդականի հետ տեղի ունեցածը թերևս հարցի լավագույն պատասխանն է։ Հիշեցնենք, որ ընտրական նախորդ շրջափուլում Հայաստանի հավաքականը միևնույն ենթախմբում էր ընդգրկված Ռուսաստանի, Սերբիայի, Ավստրիայի, Հյուսիսային Մակեդոնիայի և Ջիբրալթարի հավաքականների հետ։ Արթուր Ոսկանյանի գլխավորությամբ վաստակելով 9 միավոր՝ Հայաստանի հավաքականը ենթախմբում զբաղեցրել էր 4-րդ հորիզոնականը։ Շատերն այս արդյունքը որակեցին ձախողում։ Այսօրը պատկերը շատ ավելի տխուր է։ ՀՖՖ-ի ղեկավարությունը Շվեդիայում տեղի ունեցած խայտառակությունից ժամեր անց Ֆլորեսին ազատեց աշխատանքից։ Ցավալի է, որ միայն 10։0 հաշվով պարտությունից հետո ֆուտբոլի ֆեդերացիայում հասկացան, որ Մելենդեսի և մասնավորապես իսպանական մոդել կոչվածը մեղմ ասած արդյունավետ չէ։
Հայաստանցի մասնագետի նշանակումը ստիպում է ենթադրել, որ ՀՖՖ-ն ձերբազատվում է ըստ էության փլուզված իսպանական մոդելից։
