«Մանչեսթեր Յունայթեդը» 6-րդ անընդմեջ հաղթանակը տոնեց նորվեգացի մասնագետ Օլե-Գունար Սուլշերի գլխավորությամբ: Այս մասնագետը բացառիկ ռեկորդ սահմանեց հեղինակավոր ակումբի պատմության մեջ: Նա առաջին մարզիչն է, ում հաջողվել է նշանակումից հետո 6 անընդմեջ հաղթանակի հասնել: Հեռավոր 1946 թվականին «Յունայթեդը» 5 անըմդմեջ հաղթանակ էր տարել նորանշանակ գլխավոր մարզիչ սըր Մեթ Բասբիի գլխավորությամբ: Հիշեցնենք, որ Սուլշերը փոխարինեց պաշտոնանկ արված պորտուգալացի մարզիչ Ժոզե Մոուրինյոյին:
Վերջինս ուղղակի հողին էր հավասարեցրել «Յունայթեդի» խաղը: Մոուրինյոյի հեռանալուն պես «Մանչեսթեր Յունայթեդը» ցուցադրում է բոլորովին նոր որակի ֆուտբոլ: «Յունայթեդն» ուղղակի կերպարանափոխվել է և շատ վերլուծաբաններ արդեն իսկ տեղի ունեցածը որակում են ֆանտաստիկ: Եթե Մոուրինյոյի գլխավորությամբ այս թիմի լավագույն հնգյակում հայտնվելը իրատեսական չէր, ապա այսօր «Մանչեսթեր Յունայթեդը» 41 միավորով 6-րդ տեղում է և իրական հնարավորություն ունի մրցանակային եռյակի համար պայքարելու: 41 միավոր ունի նաև 5-րդ հորիզոնականում գտնվող «Արսենալը»: Երեկ տեղի ունեցած 22-րդ տուրի կենտրոնական խաղում «Յունայթեդը» Լոնդոնում 1:0 հաշվով առավելության հասավ 3-րդ հորիզոնականում գնվող «Տոտենհեմի» նկատմամբ: Սուշերի գլխավորությամբ «Մանչեսթեր Յունայթեդի» կտրուկ վերելքը խոսում է այն մասին, որ տիտղոսակիր թիմի վերջին տարիների ճգնաժամի միակ մեղավորը Մոուրինյոն էր: Այսինքն բոլորը համոզվեցին, որ «Յունայթեդն» ունի մեծ պոտենցիալ, որը Մոուրինյոն չէր կարողանում օգտագործել: Թիմում առկա մթնոլորտը թույլ չէր տալիս ֆուտբոլիստներին ցուցադրել այն խաղը, որին սպասում էին միլիոնավոր երկրպագուներ: Ավելին, Մոուրինյոյի անձնական ամբիացիաների հետևանքով «Յունայթեդից» հեռացան առանցքային ֆուտբոլիստներ և մասնավորապես Հայաստանի ազգային հավաքականի ավագ Հենրիխ Մխիթարյանը: Ունենալով հիանալի գործիքակազմ Մոուրինյոն փորձում էր համոզել, որ բարձր արդյունքի հասնելու համար անհրաժեշտ են ժամանակ և նոր կադրեր: Անցյալ տարվա ձմռանը «Մանչեսթեր Յունայթեդը» Մխիթարյանին փոխանակեց «Արսենալի» չիլիացի կիսապաշտպան Ալեքսիս Սանչեսի հետ: Մոուրինյոյին թվում էր թե Սանչեսը բեկում կմտցնի իր թիմի առջևի օղակում բայց․․․:
Մոուրինյոն կրկին սխալվեց: Մեկ տարվա ընթացքում Ալեքսիս Սանչեսը «Մանչեսթեր Յունայթեդի» կազմում անց է կացրել 23 հանդիպում և խփել ընդամենը 3 գնդակ: Այսօր Մխիթարյանն «Արսենալի» առաջատար ֆուտբոլիստներից է և ցուցադրում է կայուն ֆուտբոլ: Մեր կիսապաշտպանը հաջող էր խաղում նաև «Յունայթեդում» և եթե չիլիներ Մոուրինյոյի գործոնը այսօր իրավիճակը կարող էր այլ լիներ: Պորտուգալացի մասնագետի քմահաճության հետևանքով «Մանչեսթեր Յունայթդում» տառապել են մի շարք ֆուտբոլիստներ: Վերջին շրջանում Մոուրինյոյի թիրախում Պոլ Պոգբան էր, որը դուրս էր մնացել թիմի մեկնարկային կազմից: Ավելին, խոսվում էր, որ ֆրանսիացի ֆուտբոլիստը մտադիր է հեռանալ: Ըստ ԶԼՄ-ների Պոգբային ամեն գնով ցանկանում էր ձեռք բերել նրա նախկին թիմը՝ Թուրինի «Յուվենտուսը»: Մոուրինյոյի հեռանալուց հետո Պոգբան ոչ միայն հիմնական կազմ վերադարձավ այլև սկսեց ցուցադրել տպավորիչ խաղ: Վառ ապացույցը երեկվա հանդիպումն է, որտեղ Պոգբան կարծում ենք լավագույնն էր «Յունայթեդի» կազմում: Հենց Պոգբայի փայլուն փոխանցումից հետո Մարկուս Ռեշֆորդը դարձավ հանդիպման միակ և հաղթանակային գոլի հեղինակը: Մոուրինյոյի հեռանալուց հետո Պոգբան արդեն իսկ 4 գոլի հեղինակ է դարձել: Մոուրինոյի «ձեռքը» տառապում էին նաև Խուան Մատան, Լյուկ Շոուն, Անտոնի Մարսիալը, Ռոմելու Լուկակուն․․․:
Վերջին 6 հանդիպումներում թվարկված ֆուտբոլիստները ոչ միայն աչքի են ընկնում լավ խաղով, այլև արդյունավետությամբ: Վերջին 6 հանդիպումներում «Մանչեսթեր Յունայթեդը» խփել է 17 և բաց թողնել ընդամենը 3 գնդակ: Մինչև «Մանչեսթեր Յունայթեդում» աշխատանքի անցնելը Սուլշերը գլխավորել է նորվեգական «Մյոլդե» և Ուելսի «Քարդիֆ» թիմերը: Նա առանձնապես չէր փայլել ցույց տված արդյունքներով և մարզչական որակներով: Նշենք, որ Սուլշերը «Մանչեսթեր Յունայթեդի» գլխավոր մարզչի ժամանակավոր պաշտոնակատարն է: Գրանցված արդյունքներից հետո կարծում ենք պարզ է, որ «Մանչեսթեր Յունայթեդի» ղեկավարությունը Սուլշերին պաշտոնապես կնշանակի թիմի գլխավոր մարզիչ: Տեղի ունեցած ֆուրորից հետո կարծում ենք այլևս մարզիչ հրավիրելը ոչ միայն անմտություն կլինի, այլև չի ընկալվի երկրպագուների կողմից: Հիշեցնենք, որ Սուլշերը 1996-2007 թվականներին ելույթ է ունեցել «Մանչեսթեր Յունայթեդում»:
Այս ընթացքում անցկացնելով 235 հանդիպում՝ նորվեգացի հարձակվողը դարձել էր 91 գոլի հեղինակ: Ինչևէ Մոուրինյոյի հեռանալուց հետո «Մանչեսթերի» ֆանտաստիկ կերպարանափոխությունը որոշակի ափսոսանքի զգացողություն է առաջացնում: Վստահ ենք, որ եթե Մխիթարյանը այնուամենայնիվ մնար «Յունայթեդում» այսօր նրա առաջ բոլորովին նոր հորիզոն կբացվեր: Ու փաստորեն, Մխիթարյանին անհրաժեշտ էր «Յունայթեդում» դիմանալ ընդամենը մեկ տարի:
Դիմանալով ճնշումներին՝ «Յունայթեդի» մի շարք ֆուտբոլիստներ այսօր ազատություն են ստացել և խաղադաշտում ներդնում են իրական ներուժը:
