Ազգային ժողովի արտահերթ ընտրությունների ընթացքում ընտրական իրավունքը պաշտպանելու նպատակով քաղաքացիներին իրավաբանական օգնություն տրամադրող «Իրազեկ եւ պաշտպանված ընտրող» նախաձեռնության արագ արձագանքման խմբերը այցելել են Երևանի, Սյունիքի և Սյունիքի շուրջ 280 ընտրատեղամասեր: Ինչպես տեղեկացնում է նախաձեռնության արագ արձագանքման խմբերը ընտրատեղամասերում արձանագրել են մի քանի թերություններ, որոնք հիմնականում կրում էին տեխնիկական բնույթ:
Օրինակ՝ փոքր տարածքի պատճառով քվեախցերն իրար մոտ էին տեղադրված կամ իրազեկման պակասի հետևանքով քաղաքացիները քվեարկության կարգի խախտումներ էին թույլ տալիս, որոնք հանձնաժողովականների միջամտությամբ շտկվում էին:
8/63 ընտրատեղամասում ընտրողը քվեաթերթիկները և ծրարը ձեռքին՝ դուրս է եկել տեղամասից: Հանձնաժողովականներից մեկի ցուցումով՝ ընտրողը վերադարձել է քվեախուց: «Իրազեկ եւ պաշտպանված ընտրող» նախաձեռնության անդամի նախաձեռնությամբ դեպքն արձանագրվել է մատյանում: Արագ արձագանքման խումբը ընտրատեղամասում ընտրողների կուտակում էր նկատել, որը կարճ ժամանակ անց հանձնաժողովի անդամները կարգավորել են:
8/58 ընտրատեղամասում «Իրազեկ եւ պաշտպանված ընտրող» նախաձեռնության անդամը նկատել է, որ քաղաքացին քվեախցից դուրս է գալիս առանց ծրարի: Ընդ որում, առանց պարզելու, թե որտեղ է ծրարը, հանձնաժողովի անդամներից մեկը նրան մեկ այլ ծրար է տվել: Նախաձեռնության անդամը դեպքի մասին տեղյակ է պահել հանձնաժողովի նախագահին, որը մտել է քվեախուց եւ չքվեարկված քվեաթերթիկների տուփում հայտնաբերել է ծրարը: Նախաձեռնության անդամի ցուցմամբ՝ այս դեպքն էլ է արձանագրվել մատյանում:
Շրջայցի ընթացքում որոշ քաղաքացիներ դիմել են «Իրազեկ եւ պաշտպանված ընտրող» նախաձեռնությանը՝ տեղեկացնելու, թե ինչպես են քվեարկելու: Նախաձեռնության դիտորդները նրանց բացատրել են քվեարկության կարգը:
Արագ արձագանքման խմբին նաև ահազանգեր են եղել՝ կապված ռեյտինգային թեկնածուների հերթական համարի անհամապատասխանության վերաբերյալ, որոնց առնչությամբ խմբի անդամների կողմից տրվել է անհրաժեշտ իրավաբանական խորհրդատվություն:
«Իրազեկ և պաշտպանված ընտրող» նախաձեռնության բոլոր դիմողներին տրամադրվել է իրավաբանական օգնություն:
Հայաստանում 2018 թվականի Ազգային ժողովի ընտրություններին «Իրազեկ և պաշտպանված ընտրող» նախաձեռնությունը ընտրական իրավունքները պաշտպանելու նպատակով իրավաբանական օգնություն է տրամադրում քաղաքացիներին:
Երևանում, Գեղարքունիքում, Սյունիքում և Լոռիում գործում են իրավաբանական գրասենյակներ և արագ արձագանքման խմբեր, որոնք իրազեկում են քաղաքացիներին իրենց ընտրական իրավունքների մասին և տրամադրում անվճար իրավաբանական խորհրդատվություն ընտրական իրավունքին առնչվող ցանկացած հարցով։
Դեկտեմբերի 9-ին՝ առավոտյան ժամը 08:00-ին, բացվել են հանրապետության ողջ տարածքում ձևավորված 13 ընտրատարածքների 2010 տեղամասերը: Քվեարկությունը կավարտվի ժամը 20:00-ին, որից հետո կսկսվի ձայների հաշվարկը:
Արտահերթ խորհրդարանական ընտրություններին մասնակցում է 11 քաղաքական ուժ՝ 9 կուսակցություն և 2 դաշինք: Մասնակցող ուժերն են՝ Հայաստանի Հանրապետական կուսակցությունը, «Քաղաքացու որոշում» սոցիալ-դեմոկրատական կուսակցությունը, «Հայ Յեղափոխական Դաշնակցություն» կուսակցությունը, «Իմ քայլը» կուսակցությունների դաշինքը, «Լուսավոր Հայաստան» կուսակցությունը, «Քրիստոնեա-ժողովրդական վերածնունդ» կուսակցությունը, «Ազգային առաջընթաց» կուսակցությունը, «Մենք» դաշինքը, «Օրինաց Երկիր» կուսակցությունը, «Սասնա ծռեր» կուսակցությունը և «Բարգավաճ Հայաստան» կուսակցությունը:
Համաձայն ՀՀ ոստիկանության տվյալների՝ ընտրողների ընդհանուր թիվը 2 միլիոն 573 հազար 779 է: