Ավստրայում ուսումնամարզական հավաք անցկացնող Դոնեցկի «Շախտյոր»-ն այսօր հերթական ստուգողական խաղում հաղթանակ տոնեց: Այս անգամ ուկրաինական ակումբի մրցակիցը Ավստրիայի բրոնզե մեդալակիր «Աուստրիա»-ն էր:
Հանդիպման 20-րդ րոպեին հաշիվը բացեց Հայաստանի հավաքականի առաջատար Հենրիկ Մխիթարյանը` վերջին երեք հանդիպումներում խփելով իր երկրորդ գնդակը: 3 րոպե անց Ադրիանոն կրկնապատկեց այն: 59-րդ րոպեին ավստրիացիներին հաջողվեց կրճատել հաշվի տարբերությունը, աչքի ընկավ Ստանկովիչը: 85-րդ րոպեին Սրնան տուգանային հարվածով դրեց հանդիպման վերջակետը: «Աուստրիա»-«Շախտյոր»` 1:3:
Նշենք, որ Հայաստանի հավաքականի կիսապաշտպան Հենրիկ Մխիթարյանը փոխարինվեց հանդիպման 72-րդ րոպեին, նրա փոխարեն խաղադաշտ մտավ Կոբինը:
