Կատալոնական «Բարսելոնա»-ի գլխավոր մարզիչ Խերարդո Մարտինոն չի կարևորում այն փաստը, որ իր թիմն Իսպանիայի Լա Լիգայի առաջին խաղաշրջանի արդյունքում մնաց առաջին հորիզոնականում:
«Վիսենտե Կալդերոն» մարզադաշտում երեկ հանդիպեցին առաջնության 2 առաջատարները` Մադրիդի «Ատլետիկո»-ն ու «Բարսելոնա»-ն, և 90 րոպեի արդյունքում այդպես էլ չորոշեցին հաղթողին` արձանագրելով գոլազուրկ ոչ-ոքի:
«Ոչ-ոքին լավ արդյունք է առաջնության մյուս առաջատարի հետ մրցավեճում: Մենք ցանկանում էինք հաղթել, բայց ես իմ խաղացողներին մեղադրելու պատճառ չունեմ: Յուրաքանչյուր թիմ էլ խնդիրներ կունենա «Ատլետիկո»-ի դեմ խաղում: Նրանց հետ հանդիպումներում մրցակիցները չեն ունենա գոլային շատ հնարավորություններ:
Ոչինչ չի նշանակում, որ մենք ձմեռային չեմպիոններ ենք, ոչ ոք չի հիշում առաջնության առաջին խաղաշրջանի հաղթողներին, ես նախընտրում եմ լինել ամառային չեմպիոն: Կարծում եմ, որ «Ատլետիկո»-ն կպայքարի մինչև մրցաշարի ավարտը»,- ասել է Մարտինոն:
«Բարսելոնա»-ն ու «Ատլետիկո»-ն այս հանդիպումից հետո ունեն 50-ական միավորներ, բայց կատալոնական թիմը պահպանեց առաջատարի դիրքը` լրացուցիչ ցուցանիշներով:
