Նախօրեին լրագրողների հետ հանդիպմանը Հայաստանի ֆուտբոլի ֆեդերացիայի նախագահ Ռուբեն Հայրապետյանը հայտարարեց, որ այս պաշտոնում իրենից բացի չի տեսնում ոչ մեկի։ Հայրապետյանը նշեց նաև, որ ՀՖՖ նախագահի առաջիկա ընտրությունները տեղի են ունենալու 2019 թվականի փետրվարին։
Հիշեցնենք, որ օրենսգրքում առկա փոփոխությունների համաձայն՝ մեր երկրում գործող իրավաբանական անձանց միավորումները մինչև այս տարվա փետրվարը պետք է վերագրանցվեին ՀՀ արդարադատության նախարարությունում որպես հասարակական կազմակերպություններ կամ լուծարվեին: Իրավաբանական անձանց միավորումների գործունեությունը մեր երկրում այլևս դադարեցված է: Հաշվի առնելով, որ շատ իրավաբանական անձանց միավորումներ մինչև փետրվար չէին հասցրել վերագրանցվել, գործողության ժամկետը երկարացվել էր մինչև 2019 թվականի փետրվարը:
Հայաստանի ֆուտբոլի ֆեդերացիան իրավաբանական անձանց միություն է և, դառնալով հասարակական կազմակերպություն, բնականաբար կստանա նոր կարգավիճակ: Այս պարագայում պետք է տեղի ունենան նախագահի նոր ընտրություններ:
«Առաջին լրատվական»-ի հավաստի աղբյուրների համաձայն՝ Ռուբեն Հայրապետյանը ՀՖՖ նախագահի պաշտոնում պետք է վերընտրվեր դեռևս հունիսի 8-ին: Ֆուտբոլային ակումբները ՀՖՖ-ից ստացել էին նամակներ՝ մասնակցելու այդ օրը նախատեսված տարեկան ժողովին: Այդ ժողովի օրակարգը, սակայն, ակումբների ներկայացուցիչներին հայտնի չէր: Եվ ահա հունիսի 8-ին սուսուփուս հավաքելով ՀՖՖ գործկոմին և ակումբի ներկայացուցիչներին՝ Ռուբեն Հայրապետյանը ցանկացել էր հասարակությունից թաքուն կազմակերպել ընտրություններ և վերարտադրվել:
Հայրապետյանի այս քայլը կանխել էր «Շիրակ» ֆուտբոլային ակումբը: Ավելի ստույգ՝ Ռուբեն Հայրապետյանի հերթական դավադրությունը կյանքի կկոչվեր, եթե «Շիրակ»-ը հանդես չգար հայտարարությամբ, որում, մասնավորապես, ասված էր. ««Շիրակ»-ը պահանջում է փոխել հունիսի 8-ին կայանալիք ՀՖՖ ժողովի օրը, քանի որ ՀՖՖ-ն մեզ այդպես էլ չտրամադրեց ժողովի անցկացման օրակարգը. ըստ ՀՖՖ կանոնադրության 8-րդ գլխի 8-րդ կետի՝ Գործադիր կոմիտեն ժողովի անցկացման օրվանից 10 օր առաջ ժողովի պատվիրակներին ներկայացնում է ժողովի օրակարգի նախագիծը և համապատասխան նյութերը»:
Այս հայտարարությունից ընդամենը ժամեր անց ՀՖՖ-ն հաղորդագրություն տարածեց, թե իբր Գործադիր կոմիտեի նիստ է տեղի ունեցել, և որոշվել է ժողովը հետաձգել: Կարծում ենք՝ ամեն ինչ պարզ է և ընկալելի: Ու հիմա Հայրապետյանը հայտարարում է, որ ընտրությունները կայանալու են փետրվարին: Զգալով, որ իր ձևավորած բուրգը լուրջ ճաքեր է տվել, Հայրապետյանը այժմ մտադիր է ժամանակ ձգել:
Սեպտեմբերին կմեկնարկի Ազգերի լիգայի խաղարկությունը, և այս մրցաշարը, ըստ Հայրապետյանի, կարող է փրկել իրեն: Մասնավորապես, Ազգերի լիգայի խաղարկության խմբային փուլն ավարտվելու է 2018 թվականի նոյեմբերին: Ենթախմբում հաղթող ճանաչված 4 հավաքականները արդեն 2019 թվականի ամռանը փլեյ-օֆում վիճարկելու են 2020 թվականին կայանալիք Եվրոպայի առաջնության եզրափակիչ փուլի ուղեգիրը: ՀՖՖ նախագահը հույս ունի, որ Հայաստանի հավաքականը հաղթող կճանաչվի ենթախմբում: Ոգևորության այս ալիքի վրա Հայրապետյանը ցանկանում է փետրվարին որպես ֆուտբոլային կառույցի առաջնորդ վերընտրվել: Պրիմիտիվ և անհեռանկար մի ծրագիր, որը դատապարտված է տապալման:
Հայրապետյանը, զգալով, որ իր օրերը հաշված են, ազգային թիմի գլխավոր մարզիչ Վարդան Մինասյանին թույլ տվեց, որ հավաքական հրավիրի նաև Յուրա Մովսիսյանին: Ստեղծված իրավիճակում, սակայն, նույնիսկ Յուրա Մովսիսյանը չի կարող փրկել Հայրապետյանին: Ինչպես երեկ «Առաջին լրատվական»-ի հետ զրույցում նշեց լեգենդար ֆուտբոլիստ Խորեն Հովհաննիսյանը, հայկական ակումբներն արդեն իսկ ոտքի են կանգնել և չեն ցանկանում հանդուրժել Հայրապետյանի ռեժիմը:
Հունիսի 30-ին տեղի ունեցած ՀՖՖ տարեկան հերթական ժողովում մի շարք ակումբներ ուղղակի բոյկոտեցին Հայրապետյանի կազմակերպած դավադիր քվեարկությունները: Արդյունքում ՀՖՖ-ն գնաց բացահայտ կեղծիքների, ինչը հասարակության շրջանում բողոքի լայն ալիք է բարձրացրել: Ներկայումս հասարակության գերնպատակը մինչև Ազգերի լիգայի խաղարկությունը Ռուբեն Հայրապետյանից և նրա դավադիր աշխատակազմից ձերբազատվելն է: Դրա համար, կարծում ենք, առկա են բոլոր նախադրյալները: