Հանգստյան օրերին կայացած Հայաստանի առաջնության 9-րդ տուրի հանդիպումներից հետո մրցաշարային աղյուսակում ընդամենը մեկ փոփոխություն եղավ: Տուրի կենտրոնական խաղում երկրորդ տեղում ընթացող «Գանձասար»-ը սեփական հարկի տակ 1:3 հաշվով զիջեց «Փյունիկ»-ին և թույլ տվեց վերջինին շրջանցել իրեն: Գոլերի հեղինակներ դարձան «Գանձասար»-ից Արսեն Ավետիսյանը (37 ր.), Գևորգ Ղազարյանը (26 ր.), Մարկոս Պիզելին (45+1 ր.) և Էդգար Մանուչարյանը (90 ր.) «Փյունիկ»-ից:
Ընթացիկ առաջնության միանձնյա առաջատար «Ուլիս»-ը «Հրազդան» մարզադաշտում ընդունեց «Բանանց»-ին: Հանդիպման 71-րդ րոպեին Արտակ Գրիգորյանի խփած միակ գոլի շնորհիվ Սևադա Արզումանյանի սաները նվազագույն հաշվով հաղթանակ տոնեցին ու վաստակած 20 միավորով ամրապնդեցին առաջատարի դիրքը:
Մյուս երկու հանդիպումներում «Միկա»-ն 2:1 հաշվով առավելության հասավ մրցաշարային աղյուսակի ետնապահ «Արարատ»-ի նկատմամբ, գոլերի հեղինակներ Նարեկ Բեգլարյան (30 ր.), Ռաֆայել Ղազարյան (88 ր.), Արա Հակոբյան (90+1 ր.): «Իմպուլս»-ն իր հերթին նույն հաշվով պարտության մատնեց «Շիրակ»-ին: Իմպուլսից դուբլի հեղինակ դարձավ Հովհաննես Գոհարյանը (39 ր., 58 ր.):
9-րդ տուրից հետո մրցաշարային աղյուսակն ունի հետևյալ տեսքը.
1.«Ուլիս» 20 մ.
2.«Փյունիկ» 17 մ.
3.«Գանձասար» 16 մ.
4.«Միկա» 14 մ.
5.«Իմպուլս» 14 մ.
6.«Շիրակ» 9 մ.
7.«Բանանց» 6 մ.
8.«Արարատ» 2 մ.