Այսօր կայացան Հայաստանի առաջնության 8-րդ տուրի վերջին երկու հանդիպումները: «Բանանց»-ը նոր մարզչի գլխավորությամբ սեփական հարկի տակ առաջին հաղթանակը տարավ «Արարատ»-ի նկատմամաբ և վերջինին գերազանցում է 4 միավորով:
Եթե «Արարատ»-ի գլխավոր մարզիչ Արկադի Անդրիասյանը բացակայում էր որակազրկման պատճառով, ապա «Բանանց»-ը խզել է պայմանագիրը Ստևիցա Կուզմանովսկու հետ և առաջին անգամ խաղադաշտ դուրս եկավ Ռաֆայել Ղազարյանի գլխավորությամբ:
Առաջին խաղակեսն անցավ փոքրիշատե հավասար պայքարում, և թիմերը մեկական գոլ փոխանակեցին: Հանդիպման 34-րդ րոպեին հաշիվը բացեց Արարատ Առաքելյանը, 10 րոպե անց Խորեն Վերանյանը հավասարեցրեց այն:
Երկրորդ խաղակեսում Ղազարյանի սաների առավելությունն ակնհայտ էր և նրանք գոլ խփելու մի քանի հրաշալի հնարավորություն կորցրին, սակայն 74-րդ րոպեին նույն Արարատ առաքելյանը գլխի հարվածով կրկին առաջ մղեց իր թիմին: Վերջին քառորդ ժամում «Արարատ»-ին հաջողվեց խաղը տեղափոխել մրցակցի կիսադաշտ, սակայն ավելին անել նրանց չհաջողվեց: «Բանանց»-«Արարատ»` 2:1:
Մյուս խաղում հանդիպել էին ընթացիկ առաջնության առաջատարները. «Ուլիս»-ը «Հրազդան» մարզադաշտում ընդունել էր «Գանձասար»-ին: Հանդիպումը դիտարժան չստացվեց: Տպավորությունն այնպիսին էր, որ երկու թիմերն էլ զարմացած են իրենց առաջատար դիրքերից և ամեն ինչ կանեն այն պահպանելու համար: Գրանցվեց գոլազուրկ ոչ-ոքի արդյունք:
8-րդ տուրից հետո մրցաշարային աղյուսակն ունի հետևյալ տեսքը.
1.«Ուլիս» 17 մ.
2.«Գանձասար» 16 մ.
3.«Փյունիկ» 14 մ.
4.«Միկա» 11 մ.
5.«Իմպուլս» 11 մ.
6.«Շիրակ» 9 մ.
7.«Բանանց» 6 մ.
8.«Արարատ» 2 մ.
Լուսանկարը` Սոնա Բարսեղյանի (Armenpress)