Բրիտանական հայտնի Squawka պարբերականը ծավալուն հոդվածով անդրադարձել է Դորտմունդի «Բորուսիա»-ում Հայաստանի ազգային հավաքականի կիսապաշտպան Հենրիխ Մխիթարյանի խաղին: Պարբերականը նկատում է, որ հայ ֆուտբոլիստն այս մրցաշրջանում անցկացրած 34 խաղերում անմիջական մասնակցություն է ունեցել թիմի հեղինակած 36 գոլերում:
Պարբերականը նշում է, որ Հենրիխ Մխիթարյանն այս մրցաշրջանում ամենաշատ գոլային փոխանցումներն է կատարել Եվրոպայում, մինչդեռ անցած մրցաշրջանում հենց Մխիթարյանն էր խորհրդանշում գերմանական ակումբի նախկին գլխավոր մարզիչ Յուրգեն Կլոպի անհաջողությունները:
«Երբ Մխիթարյանը 2013թ. ամռանը տեղափոխվեց Գերմանիա, նա դիտարկվում էր որպես թիմից հեռացած Մարիո Գյոթցեին փոխարինող: Մխիթարյանը գերմանական թիմ տեղափոխվեց 27.5 միլիոն եվրոյի դիմաց , ստացավ 10 համարի մարզաշապիկը և միանգամից գտավ իր տեղը թիմի մեկնարկային կազմում: Նրա աշխատասիրությունը, տեխնիկական պատրաստվածությունը մեծապես օգնում էին նրան, սակայն ինչ-որ բան նրա մոտ պակասում էր: Նա ամեն ինչ շատ լավ էր անում, սակայն ինչ-որ բան չէր ստացվում վերջին հարվածը կամ փոխանցումը կատարելիս: Մխիթարյանի համար գերմանական ակումբում անցկացրած առաջին մրցաշրջաննը շատերը չստացված համարեցին, քանի որ Չեմպիոնների լիգայում Մադրիդի «Ռեալ»-ի դեմ խաղում նա նպաստավոր դիրքից հարվածեց դարպասաձողին, իսկ թիմը արդյունքում դուրս մնաց Չեմպիոնների լիգայի խաղարկությունից: Ավելի շատ հիշվեց այդ վրիպումը, քան մրցաշրջանի ընթացքում նրա հեղնակած 13 գոլերն ու 10 գոլային փոխանցումները»,- գրում է պարբերականը:
Նշվում է, որ 2014-2015 մրցաշրջանը նրա համար ավելի բարդ դասավորվեց՝ հաշվի առնելով դորտմունդցիների անհաջողությունները: Շինջի Կագավայի վերադարձից հետո Հենրիխը տեղափոխվեց եզր, սակայն դրանից նրա խաղի արդյունավետությունը չավելացավ: «Յուրաքանչյուր շաբաթ, երբ նա աչքի չէր ընկնում, ավելի էր ճնշում նրան: Նույնիսկ այդ ժամանակ կիսապաշտպանն իսկապես հանդիսանում էր «Բորուսիա»-ի լավագույն ֆուտբոլիստներից մեկը, բայց նա աչքի չէր ընկնում եզրափակիչ գործողություններով՝ վիճակագրությունը բարելավելու համար: Այնուամենայնիվ, նա երբեք չի դադարել գնդակը փնտրելուց և միշտ հարմար պահի էր սպասում լավ անցում կատարելու համար»,- ասված է հոդվածում:
Պարբերականը գրում է, որ ներկայում, խաղալով Թոմաս Տուխելի գլխավորությամբ, Հենրիխ Մխիթարյանը ցույց է տալիս իր իսկական որակները: «Մեծ ճնշում կար մրցաշրջանի սկզբում, սակայն նրան հաջողվեց փոխել իր դորտմունդյան կարիերայի ընթացքը: Գերմանացի մասնագետը հույս դրեց հայ ֆուտբոլիստի վրա, իսկ նա չհիասթափեցրեց մարզչին: Հնարավոր է նոր մարզչի վստահությունը կամ պարզապես նոր խաղային սխեման Հենրիխից այլ խաղացող դարձրին: Տուխելի խաղային համակարգի շնորհիվ Մխիթարյանը հնարավորություն է ստանում հեշտությամբ ներխուժել տուգանային հրապարակ՝ խուճապ առաջացնելով պաշտպանների մոտ: Տուխելի գլխավորությամբ «Բորուսիայի» խաղն ավելի հանգիստ է եւ հաշվենկատ, քան նախորդ տարիներին. Մխիթարյանը հանդիսանում է թիմի հարձակողական մեքենայի վճռորոշ օղակը:
