Չեմպիոնների լիգայի քառորդ եզրափակիչ պատասխան հանդիպումներից առաջ միայն «Մանչեսթեր Յունայթեդ»-«Չելսի» զույգի պայքարում էր ինտրիգը որոշակիորեն պահպանվել. առաջին խաղում «ազնվականներ»-ը լավ ֆուտբոլ ցուցադրեցին, սակայն պարտվեցին 0:1 հաշվով: Եթե Լոնդոնում Անչելոտտիի սաներն իսկապես առավելություն ունեին, և գրանցված արդյունքը կարելի էր արդարացի չհամարել, ապա պատասխան խաղում «կարմիր սատանաներ»-ը ոչ մի հնարավորություն չտվեցին նրանց:
«Չելսի»-ն շատ ակտիվ սկսեց հանդիպումը, սակայն Ալեքս Ֆերգյուսոնի սաները կարողացան հաղթահարել մեկնարկային ճնշումն ու խաղը վերցնել իրենց ձեռքը: Առաջին խաղակեսի ավարտից 2 րոպե առաջ Չիչարիտոն եզրափակեց Գիգսի փոխանցումը` առաջ մղելով իր թիմին: Երկրորդ խաղակեսում «ազնվականներ»-ը շատ ավելի տխուր տեսք ունեին և մի քանի անգամ հրաշքով փրկվեցին ընդունած երկրորդ գոլից:
Այդուհանդերձ, 77-րդ րոպեին բազմափորձ Դրոգբային հաջողվեց հավասարեցնել հաշիվը, այդպիսով հույս պարգևելով «Չելսի»-ի երկրպագուներին: Սակայն ուրախությունը երկար չտևեց. հաջորդ իսկ գրոհի ժամանակ Պակը կրկին առաջ մղեց «Յունայթեդ»-ին: «Մանչեսթեր Յունայթեդ»-«Չելսի»` 2:1: Ֆերգյուսոնի սաները կիսեզրափակիչում են:
Երեկ կայացած մյուս քառորդ եզրափակիչում, որը ձևական բնույթ էր կրում, ավելի շատ հետաքրքիր էր` կկարողանար «Շախտյոր»-ը շարունակել սեփական հարկի տակ անպարտելի սերիան: Սակայն Գվարդիոլան, հաշվի առնելով «Բետիս»-ի հետ Իսպանիայի գավաթի խաղարկության կիսաեզրափակիչ հանդիպումների փորձը /5:1 հաղթանակ սեփական հարկի տակ, 3:5 պարտություն հյուրընկալվելիս/, խաղադաշտ մտցրեց իր ուժեղագույն ֆուտբոլիստներին:
Չնայած կատալոնացիները կարողացան ավելի բարձր կարգի շնորհիվ ընդհատել «հանքափորներ»-ի՝ սեփական հարկի տակ անպարտելի սերիան, հանդիպումն ընդհանուր առմամբ հավասար ստացվեց: Միակ գոլը խփեց Լիոնել Մեսսին, ում համար դա 9-րդն էր Չեմպիոնների լիգայի ընթացիկ խաղարկությունում:
Շատ լավ տպավորություն թողեց «Շախտյոր»-ի հայ լեգեոներ Հենրիկ Մխիթարյանը, որը ոչ միայն երկու հրաշալի փոխանցում կատարեց, որոնցից հետո խաղընկերները պարտավոր էին օգտվել, այլ նաև հրաշալի էր գործում պաշտպանությունում: Մի դեպքում էլ` Հենրիկի հուժկու հարվածից հետո, միայն Վալդեսի անձնուրաց ցատկը փրկեց «Բարսելոնա»-ին: «Շախտյոր»-«Բարսելոնա»` 0:1: Կատալոնացիները պաշտոնապես կիսաեզրափակիչում են: