Ֆրանսիական Էվիան-լե-Բեն քաղաքում անցկացվող գագաթնաժողովի ժամանակ Մեծ յոթնյակի երկրների ղեկավարները համատեղ հայտարարություն են տարածել՝ պարտավորվելով մեծացնել ճնշումը Ռուսաստանի վրա և շարունակել աջակցությունն Ուկրաինային։
«Մենք պարտավորվում ենք մեծացնել ճնշումը Ռուսաստանի ռազմական տնտեսության վրա։ Այս համատեքստում մենք կուժեղացնենք մեր պատժամիջոցները, այդ թվում՝ նավթի և գազի ոլորտների վրա», – նշված է փաստաթղթում։
Ըստ հայտարարության՝ հիմա դրա համար «հարմար պահ» է, քանի որ ԱՄՆ նախագահ Դոնալդ Թրամփը համաձայնության է հասել Իրանի հետ Հորմուզի նեղուցի բացման հարցում։
G7-ի առաջնորդները նաև ընդգծել են, որ միասնական են Ուկրաինային «անսասան աջակցություն ցուցաբերելու» հարցում, որը պաշտպանում է իր ազատությունը, ինքնիշխանությունը և տարածքային ամբողջականությունը։
«Մենք վերահաստատում ենք մեր համերաշխությունն Ուկրաինայի բնակչությանը, որը տառապում է կարևորագույն ենթակառուցվածքների և մշակութային ժառանգության վրա հարձակումներից։ Մենք բարձր ենք գնահատում Ուկրաինայի դիմացկունությունը և վերջին ամիսներին մարտադաշտում նրա առաջընթացը և ընդգծում ենք, որ այժմ այնտեղ նոր դինամիկա է դիտվում», – նշված է հայտարարության մեջ։
Մեծ յոթնյակի ղեկավարները շեշտել են, որ այս դինամիկային աջակցելու և այն արագացնելու համար համաձայն են «ավելացնել օդային պաշտպանության հզորությունների, լրացուցիչ համակարգերի և կալանող սարքերի, ինչպես նաև հեռահար հնարավորությունների մատակարարումը»։ Նրանք նաև պատրաստակամություն են հայտնել քննարկելու Ուկրաինային լիցենզիաների տրամադրման հարցը, որոնք թույլ կտան ավելացնել երկրի ռազմական արտադրությունը։
Բացի այդ, G7-ի երկրները խոստացել են լրացուցիչ աջակցություն տրամադրել Ուկրաինայի էներգետիկ ոլորտին, որպեսզի երկիրը հաղթահարի հաջորդ ձմեռը։
Համատեղ հայտարարության մեջ առանձին կետերով անդրադարձ է կատարվել նաև Մերձավոր Արևելքին և Հնդկախաղաղօվկիանոսյան տարածաշրջանին։
