«Բարսելոնա»-ի կիսապաշտպան Խավիեր Մասկերանոն զուգահեռներ է անցկացրել «կապտանռնագույններ»-ի հարձակվող Լիոնել Մեսսիի և «Մանչեսթեր Սիթի»-ի ռմբարկու Սերխիո Ագուերոյի միջև: Մասկերանոն նշել է, որ իր խաղըկերոջ հետ ոչ ոք չի կարող համեմատվել:
«Մեսսին և Ագուերոն շատ տաղանդավոր են: Ագուերոն հզոր է, արագավազ: Նրան դժվար է դիմակայել, չեզոքացնել վտանգը: Խոսք է գնում աշխարհի լավագույն ֆուտբոլիստներից մեկի մասին:
Բայց ես միշտ ասել եմ, որ դժվար է համեմատել մյուս ֆուտբոլիստներին Մեսսիի հետ: Լեոյի մակարդակի խաղացող չկա աշխարհում: Ագուերոն և Մեսսին նման են իրենց ցուցադրած խաղի միայն որոշ առումներով»,- Marca-ն մեջբերում է Մասկերանոյի խոսքերը:
Հիշեցնենք` կատալոնական ակումբն ու «քաղաքայիններ»-ը դիմակայություն են անցկացնելու Չեմպիոնների Լիգայի գավաթի խաղարկության 1/8 եզրափակչի շրջանակներում: Առաջին խաղը կկայանա փետրվարի 24-ին անգլիական ակումբի հարկի տակ:
