Հայաստանի Հանրապետության սպորտի և երիտասարդության հարցերի նախարարությունը տեղեկացնում է, որ ՀՀ սպորտի և երիտասարդության նախարարությունում քննարկվել է բռնցքամարտի ֆեդերացիայի՝ օլիմպիական խաղերի նախապատրաստական քառամյա ծրագիրը: Նախապատրաստական աշխատանքներն արդյունավետ կազմակերպելու համար քառամյա ծրագիրը բաժանվել է 3 շրջանի:
Նախ՝ 2013-14թթ. լինելու է հավաքական թիմում ընդգրկվող բռնցքամարտիկների ընտրության շրջան, որը պայմանավորված է լինելու հանրապետական և միջազգային մրցաշարերում մարզիկների ցույց տված արդյունքներով: Զուգընթաց բացահայտվելու են նաև հեռանկարային հնարավորություն ունեցող մարզիկները, ովքեր հաջորդ 2 տարիների ընթացքում համալրելու են ազգային հավաքականի կազմը:
2014-15թթ. ժամանակահատվածում հաստատվելու է հավաքական թիմի կազմը, և ելնելով մարզիկների անհատական մարզական հատկանիշներից՝ աշխատանքներ են տարվելու նրանց պատրաստվածության կատարելագործման ուղղությամբ: Միաժամանակ մշակվելու են հավաքականի թեկնածուների ֆիզիկական և բարոյահոգեբանական պատրաստականության անհատական բնութագրերը, ուսումնասիրվելու են նրանց առողջական վիճակը և ֆունկցիոնալ հնարավորությունները, և նրանց համար կազմակերպվելու են վերականգնողական միջոցառումներ՝ զուգահեռաբար անցկացնելով հակախթանիչ վերահսկողական միջոցառումներ: Նշված բոլոր գործընթացները ծառայելու են մեկ նպատակի՝ ապահովել հայ բռնցքամարտիկների հաջող ելույթները 2016թ. Ռիո դե Ժանեյրոյում կայանալիք օլիմպիական խաղերին:
Ըստ ներկայացված ծրագրերի՝ 2013թ. հավաքականի անդամները մասնակցելու են ընդհանուր 1164 ժամ մարզումների, 2014թ.՝ 1256 ժամ, 2015թ.՝ 1290 ժամ և մինչև 2016թ. օլիմպիական խաղերի մեկնարկը՝ 1020 ժամ մարզումների, որոնք ներառում են ուսումնամարզական հավաքները, տեղերում կազմակերպվող մարզումները, ինչպես մարզիկների մասնակցությունները տարբեր մենամարտերի:
Ոլորտի պատասխանատուները կանխատեսում են, որ Ռիո-16-ին Հայաստանը կներկայացնեն 3 բռնցքամարտիկներ և ակնկալում են նվաճել առնվազն մեկ օլիմպիական մեդալ:
