Հայկական ըմբշամարտը մեծ կորուստ կրեց: Նոյեմբերի 28-ի լուսադեմին՝ կյանքի 79-րդ տարում կյանքին հրաժեշտ տվեց անվանի մարզիչ, ԽՍՀՄ վաստակավոր մարզիչ, Հայաստանի հանրապետության վաստակավոր մարզիչ, Մովսես Խորենացի մեդալակիր, ՀԱՕԿ-ի Տրդատ 3-րդ Արշակունի մեդալակիր, բոլորի կողմից սիրված ու հարգված Հարություն Խաչատրյանը՝ շատ-շատերի սիրելի ընկեր Հարութը:
Նրա անվանի սաներից են՝ Եվրոպայի կրկնակի, աշխարհի եռակի չեմպիոն, աշխարհի գավաթակիր Բենուր Փաշայանը, Եվրոպայի կրկնակի չեմպիոն, աշխարհի առաջնության արծաթե և Պեկինի օլիմպիական խաղերի բրոնզե մեդալակիր Ռոման Ամոյանը, օլիմպիական խաղերի արծաթե մեդալակիր, աշխարհի չեմպիոն, Եվրոպայի ու աշխարհի առաջնությունների բազմակի չեմպիոն Ալֆրեդ Տեր-Մկրտչյանը, պատանիների Եվրոպայի ու աշխարհի առաջնության բրոնզե մեդալակիր, Լոնդոնի օլիմպիական խաղերի մասնակից Հովհաննես Վարդերեսյանը, միջազգային մրցաշարերի բազամակի մրցանակակիր Արման Պապյանն ու շատ-շատերը:
Հարություն Խաչատրյանը պատրաստել է 50-ից ավելի միջազգային կարգի սպորտի վարպետներ, երկար տարիներ աշխատել է մեծահասակների ու երիտասարդների Հայասատանի ազգային հավաքականներում որպես գլխավոր և ավագ մարզիչ:
Ահա այսպիսի սրտառուչ ու ջերմ խոսքերով է հիշում իր թանկագին ու անմոռանալի մարզիչն նրա լավագույն սաներից մեկը, անվանի ըմբիշ Ռոման Ամոյանը.
«Չեմ հավատում, որ երկրորդ անգամ ծնող կորցրեցի …Աստված հոգիդ լուսավորի, ինձ ուժ տվող ու պայքարել սովորեցնող ՄԵԾՈՒԹՅՈւՆ… Իմ կյանքի ՈՒՍՈՒՑԻՉ, ինձ համար անմահ»:
Հայաստանի ըմբշամարտի ֆեդերացիայի մամլո ծառայություն
