ԱՊՀ երկրների պաշտպանության նախարարները Մոսկվայում կքննարկեն կառույցի անդամ պետությունների ռազմական համագործակցությանը վերաբերող հարցեր: Այս մասին գրում է Interfax-ը:
«Դեկտեմբերի 11-ին Մոսկվայում կկայանա ԱՊՀ անդամ երկրների պաշտպանության նախարարների խորհրդի հանդիպումը: Ծրագրվում է, որ խորհրդի աշխատանքին կմասնակցեն Հայաստանի, Ադրբեջանի, Բելառուսի, Ղազախստանի, Ղրղըզստանի, Մոլդովայի, Ռուսաստանի, Տաջիկստանի, Թուրքմենստանի, Ուզբեկստանի և Ուկրաինայի պաշտպանական գերատեսչությունների ղեկավարները»,-հաղորդել են Մինսկում ԱՊՀ-ի գործադիր կոմիտեի մամլո ծառայությունում:
«Հանդիպման օրակարգի նախագիծը ներառում է 20-ից ավելի հարցեր, որոնք վերաբերում են ԱՊՀ շրջանակում ռազմական համագործակցության տարբեր ուղղությունների: Մասնավորապես, հանդիպմանը նախատեսվում է քննարկել հարցեր, որոնք վերաբերում են 2013-ին Համագործակցության երկրների հակաօդային պաշտպանության միացյալ համակարգի համատեղ միջոցառումների անցկացմանը»: