Գերմանացի բռնցքամարտիկ Մանուել Չարը, որն այսօր առավոտյան պարտություն է կրել ուկրաինացի բռնցքամարտիկ Վիտալի Կլիչկոյի հետ պայքարում, դժգոհել է, որ մրցավեճի մրցավարները դադարեցրել են հանդիպումը: Գերմանացի բռնցքամարտիկը ռևանշ է ցանկանում: Ըստ Չարի՝ ինքը պատրաստ էր շարունակել պայքարը՝ չնայած վնասվածքին: Նշենք, որ բռնցքամարտի չորրորդ ռաունդում Չարը ստացել էր աջ աչքի խոր բացվածք, որի պատճառով հանդիպման բժշկական անձնակազմը որոշեց դադարեցնել մարտը՝ հաղթանակը շնորհելով Կլիչկոյին:
«Ես միայն մի նպատակով էի դուրս եկել հարթակ՝ աշխարհի չեմպիոնի տիտղոսը նվաճելու: Նրանք, ովքեր ճանաչում են ինձ, գիտեն, որ երբեք չեմ նահանջում: Բայց և այնպես այս մենամարտում չհաղթեց Կլիչկոն, հաղթեց խաղի բժիշկը:
Մենամարտի դադարեցումը մեր անկյունի որոշման հետ առնչություն չունի: Ես լավ գիտեմ բռնցքամարտի կանոնները, այդ իսկ պատճառով մինչ այժմ չեմ կարողանում հասկանալ՝ ինչպես կարելի է ինձ հետազոտության հրավիրել մրցակցիս անկյունում: Նախ՝ անհրաժեշտ էր վիրակապ կպցնել բացվածքին, հետո՝ շարունակել պայքարը: Սակայն ամեն ինչ այլ էր: Այն, ինչ պատահեց, կանոնների սահմաններում չէր: Այնպես է ստացվում, որ ես հենց վնասվածք ստացա, անմիջապես դադարեցվեց հետագա պայքարը:
Այսօր ես պետք է չեմպիոն դառնայի և դարձա: «Այն, ինչ չի սպանում մեզ, դարձնում է ավելի ուժեղ». այսօր ես ապացուցեցի այս նախադասության ճիշտ լինելը: Պատասխան հանդիպում եմ ուզում Վիտալի Կլիչկոյի հետ: Եկեք հիշենք Վիտալի Կլիչկո – Լենոկս Լյուիս մենամարտը: Այնտեղ շատ դժվար իրավիճակ էր: Այնտեղ Վիտալին ցուցադրեց անկոտրում պայքար՝ հաղթելով ոչ թե Լուիսին, այլ բժշկին: Այդ ճակատամարտը տեղի ունեցավ ԱՄՆ-ում: Չե՞ք գտնում որևէ նմանություն:
Վիտաˊլի, ես պատասխան մենամարտ եմ ուզում՝ ճիշտ այնպես, ինչպես դու էիր ուզում Լյուիսի հետ մարտից հետո: Տոˊւր ինձ երկրորդ հնարավորությունը՝ քեզ հետ պայքարելու: Սա իմ մեծագույն ցանկությունն է»,- Чемпионат.com-ը մեջբերում է Չարի խոսքերը: