Լոնդոն-2012 Օլիմպիական խաղերում Ֆելփսը հռչակվեց 18-ակի Օլիմպիական չեմպիոն ու որոշեց ավարտել կարիերան: Լողորդը, խոսելով իր՝ Օլիմպիական խաղերում մասնակցության մասին, ասել է.
«Ես նույնիսկ չեմ կարող երազել ու ցանկանալ ավելին: Ամեն ինչ գնում է իմ ծրագրերի համաձայն: Ես շատ եմ աշխատել, տքնաջան եմ աշխատել ու հասա այն արդյունքին, որին արժանի եմ: Երջանիկ եմ, որ նվաճեցի ոսկին: Սա մեծ բան է իմ թիմի համար, և ես ուրախ եմ, որ այս թիմի կազմում եմ:
Այսօր ավելի վաղ եմ արթնացել, քան սովորաբար: Չէի կարողանում հարմար տեղ գտնել. ընդամենը մի քանի ժամ եմ կարողացել քնել, բայց հիմա էլ չեմ կարողանում քնել: Իմ կյանքում առաջին դեպքն է, որ արթնանում եմ ու մարզվելու ցանկություն չեմ ունենում: Անկեղծ ասած՝ անմեկնելի զգացողություններ են. ես չգիտեմ՝ ինձ ինչպես պահեմ հիմա:
Ամենակարևորը, որ կարողացել եմ ցույց տալ համայն աշխարհին այն է, որ լավ աշխատելով՝ կարող ես հասնել ցանկալի արդյունքի: Ես շատ եմ տանջվել՝ Մայքլ Ֆելփս դառնալու համար: Քսան տարի է՝ ես սպորտով եմ զբաղվում, ու հասել եմ այն ամենին, ինչ որ ցանկացել եմ: Հաղթել 18 ոսկե մեդալ. դա անբացատրելի է»:
