Մեկնարկել են Լոնդոնի 2012 թվականի ամառային Օլիմպիական խաղերը։ Հայ օլիմպիականներից 7-ն արդեն ավարտել են իրենց ելույթները: Ամփոփելով նրանց ելույթները՝ ցավով պետք է փաստել, որ Հայաստանի ներկայացուցիչների պարտությունները հաջորդում են իրար: Ամեն անգամ հայ մարզասերը սրտատրոփ սպասում է հաջողությանը, սակայն ձախողված ելույթները հաջորդում են մեկը մյուսին։ Մեզ մնում է միայն չհուսահատվել և հավատալ, որ անհաջող շարքը վերջապես կընդհատվի։
Խոստումնալից մեկնարկեց 30-րդ ամառային Օլիմպիական խաղերում Հայաստանի առաջին ներկայացուցիչը՝ 29-ամյա գյումրեցի ձյուդոիստ Հովհաննես Դավթյանը, որը հանդես էր գալիս 60 կգ քաշային կարգում: Մարզիկը 1/32 եզրափակիչում պարտության մատնեց գերմանացի 24-ամյա մարզիկ Տոբիաս Էնգլմայերին: Հաջորդ փուլում Հովհաննեսն առավելության հասավ ադրբեջանցի 21-ամյա ձյուդոիստ Իլգար Մուկիշևի նկատմամբ: 1/8 եզրափակիչում Դավթյանը պարտության մատնեց ղազախ մարզիկ Յերկեբուլան Կոսաևին, որից հետո չկարողացավ զարգացնել իր հաջողությունը և զիջեց իտալացի Էլիո Վերդեի հետ պայքարում: Դավթյանը բրոնզե մեդալի համար պայքարում զիջեց ֆրանսիացի մարզիկ Սոֆիան Միլոուսին և լքեց պայքարը:
Հրաձիգ Նորայր Բախտամյանը «ատրճանակ-10 մ» մրցման արդյունքում զբաղեցրեց 16-րդ հորիզոնականը: Մարմնամարզիկ Արթուր Դավթյանը գրավեց 36-րդ տեղը: Լոնդոնի Օլիմպիական խաղերը լքեց նաև բռնցքամարտիկ Անդրանիկ Հակոբյանը: 1/32 եզրափակիչում հայ մարզիկին պարտության մատնեց ԱՄՆ ներկայացուցիչ Տարել Գաուշան: Առաջին ռաունդն ավարտվեց 4:3 հաշվով` մեր մարզիկի հաղթանակով, սակայն 2-րդ ռաունդում մրցավարն ընդհատեց մենամարտը` գրանցելով տեխնիկական նոկաուտ:
Հայաստանի մեկ այլ ներկայացուցիչ` Անահիտ Բարսեղյանը ևս անհաջող ելույթ ունեցավ Լոնդոնի 2012 թվականի ամառային Օլիմպիական խաղերում: Թիկնալողի 100 մ մրցույթում նա 5 մասնակիցների մեջ գրավեց 4-րդ տեղն ու դուրս մնաց պայքարից` ընդհանուր հաշվարկում գրավելով 44-րդ հորիզոնականը:
Ձյուդոիստ Արմեն Նազարյանը ևս վերադառնում է Հայաստան: 66 կգ քաշային կարգում հանդես եկող մարզիկը 1/8 եզրափակիչում զիջեց լեհ Պավել Զագրոդնիկին: 1/16 եզրափակիչում Նազարյանն առավելության էր հասել Ռայմոնդ Օվինուի նկատմամբ, սակայն չկարողացավ զարգացնել հաջողությունը: Լոնդոնի 2012 թվականի ամառային Օլիմպիական խաղերից առանց մեդալների հայրենիք է վերադառնում նաև 7-րդ մարզիկը։ 100մ ազատ ոճի լողի մրցումներում Միքայել Քոլոյանը 60 մասնակիցների մեջ գրավեց 45-րդ հորիզոնականը՝ ցույց տալով 53.82 վրկ արդյունք։
Մինչ Հայաստանի ներկայացուցիչները ձախողվում էին մեկը մյուսի ետևից, հայազգի մարզիկ Արսեն Գալստյանն առաջին օլիմպիական ոսկին էր պարգևում Ռուսաստանին: 23-ամյա ձյուդոիստը Լոնդոնի 2012 թվականի ամառային Օլիմպիական խաղերում 60 կգ քաշային կարգում դարձավ հաղթող: Նույն քաշային կարգում, որտեղ հանդես էր գալիս նաև Հովհաննես Դավթյանը£ Եզրափակիչում Գալստյանը պարտության մատնեց ճապոնացի ձյուդոիստ Հիրոակի Հիրաոկային£ «Մեկնում էի Լոնդոն ոսկե մեդալ նվաճելու համար: Ես իրագործեցի նպատակս: Երազանքս իրականություն դարձավ: Որն է իմ նո՞ր նպատակը: Նոր Օլիմպիադան»,- մեջբերում է Գալստյանի խոսքը «Ռ-Սպորտ»-ը: Մարզիկի հաղթանակն անմիջապես խրախուսվեց: Նա ստացավ «Մերսեդես S» դասի ավտոմեքենա և 60 քմ տարածքով բնակարան՝ լիովին կահավորված:
Մրցաշարի մեկնարկում օլիմպիական չեմպիոն ունեցան նաև վրացիները: 66 կգ քաշային կարգում հանդես եկող ձյուդոիստ Լաշա Շավդատուաշվիլին դարձավ չեմպիոն: Վրացի մարզիկը եզրափակիչում պարտության մատնեց հունգարացի մարզիկին` Միկլոշ Ունդվարիին: Մեդալ են նվաճել նույնիսկ ադրբեջանցիները (բրոնզ)։ Մեր հարևաններից մեդալ չունեն Թուրքիան ու Իրանը, սակայն, եթե արտառոց ոչինչ չպատահի, վերջինս նույնպես Օլիմպիական չեմպիոն կունենա՝ ծանրամարտի գերծանր քաշայինների պայքարում:
Հավելենք, որ այսօր մրցասպարեզ դուրս կգա նաև 69 կգ քաշային ծանրորդ Առաքել Միրզոյանը։