Նոյեմբերի 9-ին ֆուտբոլի Հայաստանի ազգային հավաքականը Վազգեն Սարգսյանի անվան «Հանրապետական» մարզադաշտում ընկերական հանդիպում կանցկացնի Բելառուսի ազգային թիմի հետ: Որքան էլ տարօրինակ է, բուքմեյքերական ընկերություններն այս մրցավեճում ավելի բարձր են գնահատում Հայաստանի ազգային հավաքականի հաղթելու հնարավորությունը: Մասնավորապես, Բելառուսի հաղթանակի համար սահմանված է 3.2, իսկ Հայաստանի հավաքականի հաղթանակի համար՝ 2.2 գործակից: Ոչ-ոքին էլ գնահատված է 3 գործակցով:
ՖԻՖԱ-ի դասակարգման աղյուսակում Հայաստանի հավաքականն այս պահին 90-րդն է, իսկ Բելառուսը՝ 91-րդը: Տարբեր կայքերում անցկացված հարցումների արդյունքներով՝ հայ երկրպագուների զգալի մասը չի հավատում Արթուր Պետրոսյանի գլխավորած թիմի հաղթանակին: Դե բնական է, աշխարհի առաջնության ընտրական փուլում մեր հավաքականի խայտառակ ելույթից դժվար է պատկերացնել, որ ի զորու ենք հաղթելու Բելառուսին: Այո, Բելառուսի ազգային թիմը ևս վերջին շրջանում բավական անհաջող է ելույթ ունենում:
Այո, Բելառուսը ևս տապալվեց 2018 թվականի աշխարհի առաջնության ընտրական փուլում և վաստակած միավորների քանակով նույնիսկ Հայաստանին զիջեց: Բայց ի տարբերություն Հայաստանի՝ Բելառուսն ունի ֆուտբոլ: Բելառուսի Բարձրագույն խմբի առաջնությանը մասնակցում են 16 թիմեր: Այդ 16 թիմերից մայրաքաղաք Մինսկը ներկայացնում են ընդամենը 3-ը՝ «Դինամոն», «Մինսկը», «Կրումկաչին»: Սա նշանակում է, որ այսօր ֆուտբոլով ապրում է ողջ Բելառուսը: Այս երկրի առաջին դիվիզիոնում խաղում են ևս 16 թիմեր: Ի տարբերություն Հայաստանի՝ Բելառուսի առաջին լիգայում ելույթ չեն ունենում բարձրագույն խմբի դուստր թիմերը: Այդ 16 թիմերը սուվերեն ակումբներ են: Դուստր թիմերի համար Բելառուսում գոյություն ունի, այսպես կոչված, դուբլյորների առաջնություն, որին մասնակցում են բարձրագույն բոլոր 16 ակումբների երկրորդ թիմերը: Բելառուսում գոյություն ունի նաև երկրորդ լիգա, որին մասնակցում են 14 թիմեր:
Հայաստանում բարձրագույն խմբի առաջնությանը մասնակցում են 6, իսկ առաջին խմբի առաջնությանը՝ 10 թիմեր: Այդ 10 թիմերից 6-ը բարձրագույն խմբի դուստր թիմերն են: Ինչ վերաբերում է դուբլյորների կամ երկրորդ լիգայի առաջնություններին՝ մենք բնականաբար չունենք: Չունենք թիմեր, չունենք նաև ֆուտբոլ:
Այսօր Երևան ժամանած 22 ֆուտբոլիստներից կազմված Բելառուսի հավաքականում կան ընդամենը 4 լեգեոներներ՝դարպասապահ Ալեքսանդր Գուտորը՝ ուկրաինական «Չեռնոմորեցից», պաշտպան Սերգեյ Պոլիտևիչը՝ թուրքական «Գենչլերբիրլիգիից», կիսապաշտպաններ Նիկիտա Կորզունը՝ Կիևի «Դինամոյից» և Ալեքսանդր Կարնիցկին՝ Վելիկի Նովգորդի «Տոսնոյից»: Մյուս 18 ֆուտբոլիստները ներկայացնում են Բելառուսի բարձրագույն խմբի թիմերը:
Հայաստանի ազգային հավաքական սովորաբար հրավիրվում են 7-8 ֆուտբոլիստներ բարձրագույն խմբից: Բելառուսի նկատմամբ մեր միակ առավելությունը Հենրիխ Մխիթարյանն է: Ալեքսանդր Գլեբի հեռանալուց հետո Բելառուսի ազգային հավաքականում չկան եվրոպական թոփ առաջնություններում հանդես եկող ֆուտբոլիստներ: Չնայած Բելառուսի ազգային հավաքականի ձախողմանը՝ այս երկրի ֆուտբոլի ֆեդերացիան երկարաձգել է պայմանագիրը գլխավոր մարզիչ Իգոր Կրիուշենկոյի հետ:
«Շատ ուրախ եմ, որ վստահում են ինձ: Սովոր եմ աշխատել ճնշումների տակ: Պետք է ամեն ինչ անենք բարձր արդյունք ցույց տալու համար: Ես գիտակցում եմ, որ ազգային հավաքականը մեր պետության դեմքն է: Ես հասկանում եմ, որ բոլորը հաղթանակ են ակնկալում: Կարծում եմ՝ ակնհայտ է, որ ազգային հավաքականում ձևավորվել է կորիզ: Մենք գտել ենք այն ֆուտբոլիստներին որոնց օգնությամբ կարող ենք առաջ շարժվել»,- հայտարարել էր Կրիուշենկոն:
Ի տարբերություն Բելառուսի՝ Հայաստանի հավաքականում կորիզ կոչվածը գոյություն չունի: Դրա ապացույցը Արթուր Պետրոսյանի խաղից խաղ 7-8 ֆուտբոլիստների փոփոխությունն է: Եվ վերջապես, ի տարբերություն Հայաստանի՝ Բելառուսի հավաքականն ունի դարպասապահ: Ավելին, Կրիուշենկոն դարպասապահների հարցում ունի ընտրության հնարավորություն: Մեր հավաքականի դարպասապահների մասին խոսելը, կարծում ենք, ավելորդ է: Ցավալի է, որ ոչինչ չի արվում խնդիրը լուծելու համար:
Կարծում ենք՝ բերված գործոններն ու փաստերը բավարար են՝ հասկանալու համար, որ հայկական ֆուտբոլը բավական հեռու է բելառուսական ֆուտբոլից, և որ մեր հավաքականը չի կարող հաղթել այս երկրի հավաքականին: Փաստերը վկայում են, որ ՀՖՖ-ի հետ պայմանագիրը երկարաձգած Պետրոսյանի գլխավոր թիմն այսօր ի զորու է հաղթել ծովահեններով համալրված Սենթ Քիթս և Նևիսի հավաքականին: