Եվրոպական ֆուտբոլում ամռան ամիսների գլխավոր իրադարձությունը տրանսֆերային պատուհանն է, որի ընթացքում հազարավոր խաղացողներ մի թիմից մեկ այլ թիմ են տեղափոխվում: Եթե տարիներ առաջ հայկական թիմերից բազմաթիվ խաղացողներ հայտնվում էին անհամեմատ ավելի ուժեղ թիմերում, ապա այսօր հայաստանցի ֆուտբոլիստների պահանջարկ, կարելի է ասել, Եվրոպայում չկա: Թերևս «Շիրակի» և Հայաստանի երիտասարդական հավաքականի կիսապաշտպան Վահան Բիչախչյանն էր, ով օրեր առաջ պայմանագիր կնքեց Սլովակիայի չեմպիոն «Ժիլինայի» հետ:
Ցավալի է, բայց այսօր Հայաստանի բարձրագույն խմբի առաջնության թիմերում չեն նշմարվում ֆուտբոլիստներ, ովքեր կարող են խաղալ ավելի ուժեղ թիմերում: Ավելին, արտասահմանում հանդես եկող հայ ֆուտբոլիստները ստիպված են վերադառնալ Հայաստան: Մասնավորապես, «Ալաշկերտի» հետ պայմանագիր է կնքել Հայաստանի ազգային հավաքականի թեկնածու Նորայր Ասլանյանը, ով հանդես էր գալիս հոլանդական «Տելսթար» թիմում: Ըստ «Տրանսֆերմարկետ» պարբերականի՝ Ասլանյանը անհավանական ցածր տրանսֆերայն արժեքով է հայտնվել հայկական թիմում: Ավելի ստույգ՝ «Ալաշկերտը» Ասլանյանի տեղափոխության համար վճարել է ընդամենը 50 հազար եվրո: 26-ամյա Ասլանյանը Հայաստանի ազգային հավաքականի կազմում 8 հանդիպում է անցկացրել:
Վերջին ամիսներին զգալի նվազել է Հայաստանի ազգային հավաքականում հանդես եկող լեգեոներների տրանսֆերային արժեքը: Միանգամից 2 միլիոն եվրոյով նվազել է մեր հավաքականի ավագ, «Մանչեսթեր Յունայթեդի» կիսապաշտպան Հենրիխ Մխիթարյանի տրանսֆերային արժեքը: Հեղինակավոր պարբերականը Մխիթարյանի տրանսֆերն այս պահին գնահատում է 35 միլիոն եվրո: Թե ինչով է պայմանավորված Մխիթարյանի տրանսֆերային գնի անկումը՝ դժվար է ասել:
Մոտ 50 տոկոսով անկում է ապրել Հայաստանի ազգային հավաքականի մեկ այլ առանցքային խաղացող՝ «Բեշիկթաշի» կիսապաշտպան Արաս Օզբիլիսի տրանսֆերային արժեքը: Այս պահին Օզբիլիսի տրանսֆերը գնահատված է ընդամենը 650 հազար եվրո, իսկ ամիսներ առաջ Հայաստանի հավաքականի ֆուտբոլիստի գինը 1.2 միլիոն եվրո էր:
Շարունակում է անկում ապրել նաև մեր հավաքականի առաջատարներից Մարկոս Պիզելիի տրանսֆերային գինը: Սաուդյան Արաբիայի «Ալ Շաբաբում» հանդես եկող ՀՀ հավաքականի բրազիլացի կիսապաշտպանի տրանսֆերային արժեքը, նվազելով 200 հազար եվրոյով, այս պահին գնահատված է 500 հազար եվրո:
Նշենք, որ վերջին շրջանում թե՛ Օզբիլիսը և թե՛ Պիզելին իրենց թիմերում հազվադեպ են հայտնվում հիմնական կազմում, և նրանց տրանսֆերային գների անկումը միանգամայն տրամաբանական է:
100 հազար եվրոյով նվազել է Հայաստանի ազգային հավաքականի և Իրանի «Էսթեղլալի» պաշտպան Հրայր Մկոյանի տրանսֆերը՝ հասնելով 500 հազարի: 50 հազար եվրոյով էլ նվազել է Գաել Անդոնյանի տրանսֆերային գինը և հիմա 250 հազար եվրո է: Նշենք, որ Անդոնյանի տրանսֆերը պատկանում է Մարսելի «Օլիմպիկին»:
Հայաստանի ազգային հավաքականի միակ ֆուտբոլիստը, ում տրանսֆերային արժեքը շոշափելի առաջընթաց է ապրում, Մակեդոնիայի «Վարդարում» հանդես եկող Տիգրան Բարսեղյանն է: Եթե նրա տրանսֆրային գինը ամիսներ առաջ ընդամենը 150 հազար եվրո էր, ապա հիմա նրա տրանսֆերը գնահատված է 750 հազար եվրո:
Վերջին օրերին շատ է խոսվում Հայաստանի ազգային հավաքականի նախկին հարձակվող Յուրա Մովսիսյանի ամերիկյան «Ռեալ Սոլթ-Լեյքից» այլ թիմ տեղափոխվելու մասին: Մասնավորապես, մամուլում շրջանառվող տեղեկությունների համաձայն՝ հնարավոր է, որ Մովսիսյանը վարձավճարով համալրի չեխական «Սլավիայի» շարքերը: Այս պահին Մովսիսյանի տրանսֆերային արժեքը գնահատված է 2.5 միլիոն եվրո: Նշենք, որ վերջին շրջանում Մովսիսյանը բավական հաջող է հանդես գալիս ՄԼՍ-ի առաջնությունում և գրավել էր մի շարք թիմերի ուշադրությունը: Հիշեցնենք, որ Մովսիսյանը Մոսկվայի «Սպարտակից» «Ռեալ Սոլթ-Լեյք» էր տեղափոխվել 3 միլիոն եվրոյի դիմաց: