Անթալիայից վերադառնալուց հետո «Փյունիկ»-ն այսօր առավոտյան առաջին մարզումն է անցկացրել Ավանի ֆուտբոլի ակադեմիայում: Նախքան մարզումը սկսելը գլխավոր մարզիչ Սարգիս Հովսեփյանն ակումբի մամլո ծառայության հետ զրույցում ամփոփեց ավարտված ուսումնամարզական հավաքը:
-Անթալիայի հավաքն ընդհանուր լավ եմ գնահատում: Ուժեղ ակումբների հետ ընկերական խաղեր անցկացրինք, որոնք ինչ-որ չափով ինֆորմացիա տվեցին, թե որ ֆուտբոլիստն ինչքանով է պատրաստ: Դրանից ելնելով մարզումներ էինք անցկացնում, հասկանալով՝ ինչն է պետք ավելացնել: Գտնում եմ, որ դեռևս ֆուտբոլիստներն իրենց լավագույն մարզավիճակում չեն, պարզ է, դա խաղերի ընթացքում է գալիս:
–Անցկացրած ընկերական երեք խաղերի արդյունքում գրանցվեց երկու պարտություն և մեկ ոչ–ոքի… Արդյունք, որ չի կարող գոհացուցիչ լինել «Փյունիկ»-ի համար:
-Այս խաղերում արդյունքը մեզ համար առաջնահերթ չէր: Մենք պատրաստվում էինք, խնդիրներ էինք լուծում, փոփոխություններ էինք անում, նայում էինք, թե որ ֆուտբոլիստը որտեղ կարող է օգուտ տալ, հետագայում քանի րոպե կարող է խաղալ առաջնությունում… Այնպես որ առաջնահերթ արդյունքի համար չէինք խաղում: Եվ որքան ուժեղ մրցակից ունենայինք, այնքան ավելի ուրախ էինք, քանի որ տեսնում էինք մեր բացերը:
–Համալրումների մասին խոսենք. «Փյունիկ»-ը պայմանագիր ստորագրեց Լևոն Հայրապետյանի և Զավեն Բադոյանի հետ…
-Շատ ուրախ եմ, որովհետև նրանք ազգային հավաքականի ֆուտբոլիստներ են և անպայման պետք է ինչ-որ ակումբում մարզվեն, որովհետև մոտ ապագայում շատ դժվարին խաղ ունի ազգային հավաքականը: Դրանից ելնելով ենք մենք նրանց կանչել, սակայն ինչու չէ, կօգնեն նաև «Փյունիկ»-ին իրենց բարձր կարգով: Թեև չէին մարզվել որոշ ժամանակ և մարզավիճակի խնդիր կար, բայց նրանց ընդգրկեցինք ընկերական խաղերում՝ հասկանալով, որ շատ են պետք ազգային հավաքականին:
– Հաշված օրերից վերսկսում է առաջնությունը. կկիսվե՞ք առաջնության երկորդ կեսից Ձեր ակնկալիքներով:
– Գեղեցիկ խաղ… Ակնկալում եմ, որ ի հայտ կգան նոր պատանի ֆուտբոլիստներ, որոնք հետո կներգրավվեն թե երիտասարդական, թե ազգային հավաքականներում: Դրա հետ միասին եթե լինի լավ արդյունք՝ շատ ավելի լավ:
