Երկու ամերիկուհիներ դատարան են դիմել ԱՄՆ-ի նախկին պաշտպանության նախարար Ռոբերտ Գեյթսի և ևս չորս բարձրաստիճան զինվորական ղեկավարների դեմ, այն բանից հետո, երբ նրանց բռնաբարել էին երկու հեղինակավոր բարձրագույն ռազմական ուսումնական հաստատություններում: Reuters-ի տվյալներով՝ հայցվորները՝ 20-ամյա Լիա Մարքեթն ու 22-ամյա Անն Քենձիորը, մեղադրել են Գեյթսին և այլ բարձրաստիճան պաշտոնյաների, որ նրանք ոչինչ չեն ձեռնարկել սեռական հանցագործությունները ռազմական համալսարաններում կանխելու համար:
Նշվում է, որ Քենձիորը սովորել է ԱՄՆ-ի Անապոլիսի ռազմածովային ակադեմիայում: Նա պնդում է, որ իրեն երկու անգամ բռնաբարել են իր երկու համակուրսեցիները՝ օգտվելով նրանից, որ ինքը հարբած է եղել: Քենձիորը հավելել է, որ երբ ղեկավարությունը տեղեկացել է պատահարի մասին, նրան ստիպել են կամավոր ակադեմիայից հեռանալու դիմում գրել:
Ինչ վերաբերում է Մարքեթին, ապա նա սովորել է Վեսթ-Փոինթի ռազմական ակադեմիայում: Նա հայտարարել է, որ բարձր կուրսեցի կուրսանտը բռնի կերպով հարբեցրել է իրեն ու բռնաբարել: Այն բանից հետո, երբ Մարքեթը հայտնել է այդ մասին ղեկավարությանը, մյուս համակուրսեցիները սկսել են ծաղրել նրան, իսկ ղեկավարությունը պատժել է: Նրան ստիպել են բռնացողի ետևից աղբը թափել: Դրանից հետո աղջիկը հեռացել է համալսարանից, և նրա մոտ սուիցիդալ հատկություններ են սկսել ի հայտ գալ:
Գործակալության տվյալներով՝ այդ հայցերը բացառություն չեն: Ամերիկյան բանակում ծառայություն անցնող ութ կին ևս մարտին դիմում են ներկայացրել՝ հայտարարելով, որ բանակում ծառայելու ժամանակ ենթարկվել են բռնաբարության, սեռական ոտնձգության:
