Վրաստանի նախագահ Միխեիլ Սաակաշվիլիի մամուլի ծառայությունից հայտնում են, որ Վրաստանի նախագահը ԱՄՆ այցի շրջանակներում այցելել է American Enterprise ռազմավարական հետազոտությունների կենտրոն, որտեղ մասնակցել է Ռիչարդ Հոլբրուքի հիշատակին նվիրված միջոցառումներին: Ելույթի ժամանակ Սաակաշվիլին հայտարարել է, որ Վրաստանը տարածաշրջանում զգալի ազդեցություն է ձեռք բերել:
«Վրաստանում տեղի են ունենում բարեփոխումներ, և մեր երկիրը վերջին տարիներին զգալիորեն փոխվել է: Անհրաժեշտ է ուշադրություն դարձնել այն բանին, որ Վրաստանը տարածաշրջանում շատ կարևոր ազդեցություն ունի, մեզանից փորձում են սովորել, փոխառել պետության ժողովրդավարական բարեփոխման մեր փորձը»,- նշել է Վրաստանի նախագահը` ավելացնելով, որ հաճախ են երկիր այցելում տարբեր պատվիրակություններ Ղրղզստանից, Ուկրաինայից, Մոլդովայից, Հայաստանից և այլ երկրներից:
«Դեռ ոչ վաղ անցյալում Վրաստանում իշխում էին մաֆիոզ խմբավորումները և օրինականացված հանցագործները, քրեածին առումով այն շատ նման էր Պալերմոյին»,- ասել է Սաակաշվիլին: Սակայն հիմա, նախագահի խոսքով, ըստ արտասահմանյան հեղինակավոր կազմակերպությունների ուսումնասիրությունների, Վրաստանը անվտանգ կեցության առումով գտնվում է երկրորդ տեղում Իսլանդիայից հետո: «Վրաստանում հանցագործությունների ծավալները հինգ անգամ ավելի քիչ են, քան Ռուսաստանում և մի շարք այլ հարևան երկրներում»,- ավելացրել է նա:
