Նոր տարի`տոն ու ճիշտ ժամանակ լիցքաթափվելու, ուրախանալու և ժպտալու: Ահա մոտավորապես սա է լինելու գրեթե ողջ աշխարհի մարդկանց զբաղմունքը առաջիկա օրերին, բայց տոնում ենք տարբեր կերպ` ազգային, սոցիալական և այլ առանձնահատկություններով: Մի տեղ բակերն են զարդարում ու մրցում, թե ում բակն է ամենագեղեցիկը, մի տեղ սեղանների ճոխությունն են համեմատում, մի տեղ կահույք են դուրս նետում, մեկ այլ երկրում` նորը ձեռք բերում և այսպես շարունակ: Մի բան գրեթե ամենուր նույնն է. նվերներ բոլորն են սպասում` Ձմեռ պապից, Սանտա Կլաուսից, Սուրբ Նիկոլայից կամ Կաղանդ պապից: Սպասվածը փնտրում ու գտնում են բարձի տակ, տոնածառի տակ կամ գուլպայի մեջ: Ամանորյա անակնկալները կրկին տարբերվում են աշխարհի տարբեր ծայրերում` համապատասխան երևակայության ու իհարկե` գրպանի: Միջին նորզելանդական ընտանիքը, օրինակ, ամանորյա նվերների վրա ծախսում է մոտ 800$, Մեծ Բրիտանիայում յուրաքանչյուր երեխայի համար նվերը ընտանիքին արժենում է 200- 900$` կախված ընտանիքի սոցիալական վիճակից: ԱՄՆ-ում նույնիսկ ֆինանսատնտեսական ճգնաժամից հետո դեռ ուշքի չեկած ամերիկացիները փող չեն խնայում ամանորյա նվերների համար. այս Ամանորին յուրաքանչյուր ամերիկացի նվերների խանութներում թողել է 300-500$: Ամերիկացիների մեծ մասը նվերներ է տալիս ոչ միայն ընտանիքի անդամներին, այլև ընկերներին ու կոլեգաներին:
Հայաստանում էլ, չնայած գների անտրամաբանական աճին, գոնե երեխաները նվերներ ստանում են: Նախ` մանկապարտեզներում ու դպրոցներում նախօրոք անցկացված դրամահավաքի շնորհիվ Ձմեռ պապը քաղցրեղենով ուրախացնում է նրանց: Այնուհետև մանուկներին անակնկալ սպասվում է նաև Նոր տարվա գիշերը: Նվերների համար մեր ծախսած գումարը եկեք չհամեմատենք արևմտյան պետությունների նշված ցուցանիշների հետ` հասկանալի պատճառներով: Դրա կարիքն էլ չկա: Կարևորն այն է, որ անակնկալ մատուցենք միմյանց ու անկեղծ ժպիտներ պարգևենք: Առողջ ու հաջողակ եղեք 2011թվականին: Շնորհավոր Նոր տարի:
Լուսանկարը` Օննիկ Կրիկորյանի
