Ադրբեջանական 1news.az-ի փոխանցմամբ, Ադրբեջանի պետական մաքսային կոմիտեի տվյալներով՝ այս տարվա առաջին 11 ամիսներին Ադրբեջանի արտաքին ապրանքաշրջանառությունը կազմել է 33.15 միլիարդ դոլար, ինչը մոտ 32 տոկոսով ավելի է՝ նախորդ տարվա միևնույն ժամանակահատվածի համեմատությամբ։
Ադրբեջանական արտահանումը կազմել է 24.65 միլիարդ դոլար (27 տոկոսանոց աճ նախորդ տարվա համեմատ), իսկ ներկրումը՝ 8.5 միլիարդ դոլար (մոտ 49 տոկոսանոց աճ նախորդ տարվա համեմատ)։ Ընդհանուր առմամբ, այս տարվա առաջին 11 ամիսներին Ադրբեջանն արտահանել է 2017 անուն ապրանք և ներկրել 6112 անուն ապրանք։
Հունվարից նոյեմբեր ընկած ժամանակահատվածում Ադրբեջանն արտահանել մոտ 35 միլիոն տոննա նավթ, որից ավելի քան 1.8 միլիոն տոննան՝ «Բաքու-Նովոռոսիյսկ» նավթամուղով, մոտ 3.58 միլիոն տոննան՝ «Բաքու-Սուփսա» (Վրաստան) նավթամուղով և 28.67 միլիոն տոննան՝ «Բաքու-Թբիլիսի-Ջեյհան» (ԲԹՋ) նավթամուղով։ Երկաթուղային ճանապարհով արտահանվել է 914,000 տոննա նավթ։
Հիշեցնենք, որ այս տարվա մայիսի կեսերին բրիտանական The Economist պարբերականը գրել էր, որ Ադրբեջանի նավթային եկամուտները կազմում են նրա ՀՆԱ-ի 55 տոկոսը, սակայն դա չի կարող հավերժ տևել, քանի որ նավթի արտադրությունն Ադրբեջանում հասել է առավելագույն մակարդակի. որոշ գնահատականներով, Ադրբեջանի նավթային պաշարները սպառվելու են 2028 թվականին:
