Իսրայելական Zman-ի փոխանցմամբ՝ Թել Ավիվի «Մաքկաբի» ֆուտբոլային ակումբը Թուրքիա է մեկնում առանց 6 ֆուտբոլիստների ու գլխավոր մարզիչ Մոտի Իվանիրի։ Հիշեցնենք, որ «Մաքկաբի»-ն սեպտեմբերի 15-ին Եվրալիգայի խաղարկության E խմբի շրջանակներում հանդիպում է ունենալու Ստամբուլի «Բեշիքթաշ»-ի հետ։
Բանն այն է, որ ՑԱԽԱԼ-ը, հաշվի առնելով Թուրքիայի հետ ստեղծված քաղաքական բարդ իրավիճակը և ելնելով անվտանգության նկատառումներից, բանակում ծառայող իսրայելցի ֆուտբոլիստներին արգելել է մեկնել Թուրքիա։
Նշվում է, որ դեռևս մի փոքր հնարավորություն պահպանվում է, որպեսզի վերոնշյալ 6 ֆուտբոլիստներից 4-ի վրայից հանվի մեկնման արգելքը, սակայն մյուս երկուսի դեպքում դա բացառվում է։
Հիշեցնենք, որ սեպտեմբերի 1-ին ՈւԵՖԱ-ի կարգապահական կոմիտեն եվրագավաթային 3 խաղով որակազրկել էր «Մաքկաբի»-ի գլխավոր մարզչին, ով Եվրալիգայի որակավորման 4-րդ փուլում հունական «Պանատինաիկոս»-ի հետ հանդիպման ժամանակ վիրավորական հայտարարություններ էր հնչեցրել ոչ միայն հանդիպման մրցավարի, այլև՝ մրցակից թիմի ներկայացուցիչների հասցեին։
