Շինծու գործ է, որով ավելի հերոսացնում եք Ծառուկյանին, խորհրդարանի ամբիոնից հայտարարեց ԲՀԿ նախագահ Գագիկ Ծառուկյանն իր անձեռնմխելիությունը չեղարկելու միջնորդության քննարկման ժամանակ: Ծառուկյանը չպատասխանեց պատգամավորների հարցերին և գնաց ԱԱԾ հարցաքննության: ԲՀԿ նախագահը դե՞մ է հերոսանալուն: Որովհետև, նա իհարկե իրավացի է, եթե ենթարկվում է հետապնդման, ապա հերոսանում է այն շրջանակում, որտեղ կա գործող իշխանության հանդեպ ընդդիմադիր տրամադրվածություն, դժգոհություն, որտեղ կա իշխանափոխության ցանկություն: Ըստ այդմ, ընդդիմադիր ուժի առաջնորդի ամար այդ դեպքում հերոսացումը պետք է որ լինի նախընտրելի:
Բայց, ԲՀԿ նախագահը խորհրդարանի ամբիոնից այդ մասին հայտարարում է այնպիսի տոնայնության և համատեքստի մեջ, կարծես այնքան էլ ոգևորված չէ այդ հերոսացման հանգամանքով: Արդյո՞ք Բարգավաճ Հայաստանի նախագահի այդ ակնարկը հուշում է, որ կառավարության հրաժարականի վերաբերյալ նրա հայտարարությունն ու արմատական դիրքորոշումը իրականում պարտադրված է որևէ հանգամանքի բերումով և ինքն ակնկալում էր, որ իշխանությունը դրան կտա շատ ավելի հանգիստ արձագանք և չի արդարանա ինչ-որ մի հաշվարկ, որով ԲՀԿ նախագահին պարտադրվել է այդ արմատական հռետորաբանությունը: Թե՞ նա պարզապես չէր սպասում այդպիսի կոշտ արձագանք, ուժային արձագանք լոկ այն համատեքստում, որ պատրաստ չէ գնալ կալանվելու ռիսկի:
Ինքը Ծառուկյանը հայտարարել է, որ պատրաստ է ցանկացած սցենարի, սակայն անշուշտ մի բան է թեժ իրավիճակում հռետորաբանությունը՝ մարտավարության տեսանկյունից, մեկ այլ բան է հոգեբանությունը: Թեև, ԲՀԿ նախագահը կարող էր հենց հռետորաբանության առումով էլ մարտավարական նկատառումներից ելնելով չխոսել «անտեղի հերոսացման» մասին: Ուրեմն, նրա մոտ պարզապես պահի տակ ենթագիտակցական մղում էր արտահայտությունը, թե՞ իսկապես ակնարկ իշխանությանը, որ պատրաստ է «չհերոսանալ», եթե իշխանությունը տա այդ հնարավորությունը: Իսկ եթե չտա, այդ դեպքում ինչի՞ է պատրաստ Գագիկ Ծառուկյանը հերոսացման պարագայում: Բանն այն է, որ նրա համար իրավիճակը իսկապես դառնում է բավականին սահմանային, նրան հասցնում են գագաթի, որտեղից կամ թռչում են, կամ ընկնում: Ամբողջ խնդիրը թերևս այն է, որ ԲՀԿ նախագահը գագաթին հասել է առանց «պարաշյուտի» կամ առանց «թևերի»: Խոսքը տվյալ պարագայում քաղաքական առանցքային դիրքում համապատասխան քաղաքական պատրաստվածություն և պաշար չունենալն է, որը Գագիկ Ծառուկյանը անկասկած չի կարող չզգալ:
Լուսանկարը՝ Armeniasputnik-ի
