Սեպտեմբերի 13-ին կայանալիք Ազգերի լիգայի խաղարկության Հայաստան-Ջիբրալթար հանդիպման նկատմամբ հետաքրքրությունը բավական մեծ է: Հայկական ֆուտբոլում տեղի ունեցած փոփոխություններից հետո երկրպագուները հավատում են, որ մեր ազգային թիմը կերպարանափոխված կլինի: Հայաստանի ազգային հավաքականը այս պահին չունի գլխավոր մարզիչ և գտնվում է բավական բարդ իրավիճակում:
Եթե սթափ գնահատենք իրավիճակը ապա պետք է արձանագրենք, որ Ջիբրալթարի և հոկտեմբերի 16-ին կայանալիք Մակեդոնիայի հետ մրցավեճերում մերոնց 6 միավոր վաստակելու հնարավորություններն այնքան էլ մեծ չեն: Հանդիպումից ընդամենը մեկ շաբաթ առաջ ֆուտբոլասերը չգիտի նույնիսկ թե ովքեր են հրավիրվել ազգային հավաքական, կամ ով է նրանց հրավիրել: Այս ամենը սակայն չի խանգարում երկրպագուին հավատալ, որ Հայաստանի հավաքականը կհասնի ցանկալի արդյունքի: Ազգերի լիգայի խաղարկության փլեյ-օֆ դուրս գալու համար Ջիբրալթարի նկատմամբ առավելության հասնելուց զատ անհրաժեշտ է գոնե 2:0 հաշվով հաղթել Մակեդոնիայի ընտրանուն: Ազգերի լիգայի առաջին տուրում Հայաստանի հավաքականը Երևանում Լիխտենշտեյնին 1:0 հաշվով հաղթելուց հետո Սկոպյեում 2:0 հաշվով զիջել էր Մակեդոնիային: Մրցաշարի կանոնադրության համաձայն՝ հավասար միավորների դեպքում որպես առաջնային առավելություն դիտվելու են միմյանց միջև տեղի ունեցած մրցավեճերում գրանցված արդյունքները: 2 կամ 3 գնդակի տարբերությամբ մակեդոնացիներին հաղթելու դեպքում իրական հնարավորություն կունենանք պայքարը շարունակելու:
Ազգային թիմի նկատմամբ հավատի գլխավոր խթանն ինչ խոսք մթնոլորտի փոփոխությունն է: Ռուբեն Հայրապետյանի հեռանալուց հետո կատարվեց ազգային թիմը երկրպագուին մոտեցնելու կարևորագույն քայլը: Առաջիկա հանդիպումներին «Հանրապետական» մարզադաշտում ներկա գտնվելու համար երկրպագուն կվճարի ընդամենը 1000 դրամ: Այսքան արժեն Հյուսիսային և Հարավային տրիբունաների տոմսերը: Սա մեծ ոգևորություն է առաջացրել երկրպագուների շարքերում որոնք տարիներ շարունակ պայքարում էին Հայրապետյանի կողմից սահմանված գների դեմ: Հիմա ազգային հավաքականը հասանելի է հասարակության անհամեմատ ավելի լայն շերտերի համար: Ֆուտբոլասերին մարզադաշտ վերադարձնելն ու ազգային թիմին մոտ պահելը սիրված մարզաձևը ուշքի բերելու կարևորագույն գործոններից է: Սա կարելի է համարել ֆուտբոլասերների հաղթանակը, և նրանք անպայման կօգտվեն դրանից: Կամա թե ակամա հայ երկրպագուն հետայսու շատ ավելի մոտ կլինի ազգային հավաքականին: Երկրպագուների զգալի մասը պատանիներ ու երիտասարդներ են, որոնցից շատերը ուղղակի չունեին հնարավորություն 5 հազար դրամ վճարելու «Հանրապետական» մարզադաշտում ներկա գտնվելու համար: Եվրոպա լիգայի խաղարկությունում «Փյունիկի» և «Ալաշկերտի» մասնակցությամբ հանդիպումներին, որոնց մուտքն անվճար էր, տեսանք լեցուն «Հանրապետական»: Սա հզոր մի պոտենցիալ է, որը ամեն գնով պետք է մոտ պահել ստադիոնին: Վստահ ենք, որ առաջիկա հանդիպմանը «Հանրապետական»-ում անհամեմատ ավելի շատ երկրպագուներ կլինեն, քան Հայաստան-Լիխտենշտեյն մրցավեճի ժամանակ: Ռուբեն Հայրապետյանի օրոք Հայաստանի ազգային հավաքականի մասնակցությամբ պաշտոնական հանդիպումների ժամանակ տոմսերը վաճառվում էին 4-10 հազար դրամով:
«Հանրապետական» մարզադաշտի տոմսարկղում հաստատեցին, որ նախորդ հանդիպման համեմատ տոսմերն ավելի շատ են սպառվում: Հնարավոր է, որ հանդիպման նախօրեին 1000 դրամանոց տոմսերը սպառված լինեն: Կարելի է ենթադրել, որ Ջիբրալթարի հավաքականին հաղթելու դեպքում հոկտեմբերի 16-ին «Հանրապետականում» իրական անշլագ կլինի: Փաստորեն, առաջիկա հանդիպումներում աջակցության էներգետիկային պակաս ըստ էության չի լինի: Ինչ-խոսք ցանկալի կլինի, որ մինչև Ջիբրալթարի հետ հանդիպումը մեր հավաքականն ունենա բարձրակարգ գլխավոր մարզիչ: Երկրպագուները ամեն ժամ սպասում են նորությունների:
Խաղից 7 օր առաջ մարզիչ չունենալն իսկապես անհանգստացնող է: Հուսանք, որ առաջիկա օրերին Հայաստանի ֆուտբոլի ֆեդերացիան կկատարի երկրորդ կարևոր քայլը և մեր հավաքականը կդրվի դեպի հաղթանակ տանող ռելսերի վրա:
