Այսօր կառավարության նիստի ժամանակ արդարադատության նախարարությանը հատկացվեց 18.225 եվրոյին համարժեք դրամ՝ «Սիմոնյանն ընդդեմ Հայաստանի» գործով ՄԻԵԴ-ի վճռի պահանջները կատարելու նպատակով:
Փաստաբան Հայկ Ալումյանը այս առումով պատկերը միատարր չի համարում. «Նախորդող 3 տարիներին ՄԻԵԴ-ում սուբյեկտիվ պատճառներով շատ քիչ հայկական գործեր են քննվել: Հայկական գործերը սկսել են ինտենսիվորեն քննվել այս տարվանից, բայց դա չի նշանակում, որ նախորդ 3 տարիների գործերը վերացել են, դրանք ընդամենը հետաձգվել են: Այնպես որ՝ շուտով Հայաստանում լինելու է ՄԻԵԴ վճիռների տարափ, գումարները լինելու են բավականին մեծ, ու ցավալի է լինելու մեր բյուջեի համար»:
Հայկ Ալումյանը նկատեց, որ եթե Եվրոպական դատարանը որևէ գործով վճիռ է կայացնում, դա նշանակում է, որ այդ նույն գործը Հայաստանում, բնականաբար, անցել է 3 ատյանով: Ուստի նա տարակուսելի է համարում, թե այս դեպքում ո՞ր դատավորը պետք է ենթարկվի պատասխանատվության՝ 1-ին ատյանի՞ դատավորը, Վերաքննիչ դատարանի՞ դատավորը, թե՞ Վճռաբեկ դատարանը. «Այնպես որ՝ ես չգիտեմ, թե որն է ելքը»:
Ի պատասխան դատական համակարգից վարչապետ Հովիկ Աբրահամյանի դժգոհություններին՝ Հայկ Ալումյանը արձագանքեց՝ չէ՞որ գործադիրի ճնշումների ազդեցության տակ են զանգվածային անարդարությունները կատարվել. «Ինչո՞ւ եք դատարաններին ստիպում, որ խախտեն մարդկանց սեփականության իրավունքը, որ իրականացնեն մարդկանց ապօրինի կալանավորումներ, իսկ հետո դժգոհում եք Եվրոպական դատարաններից: Նախ՝ ձեզնից սկսեք. մի՛ ճնշեք դատարաններին»:
Ուստի փաստաբանը զարմանում է, որ Հովիկ Աբրահամյանը մեղավորներին իշխանության մեջ փնտրելու փոխարեն՝ փնտրում է դատական համակարգում. «Դատական համակարգից դժգոհելու տեղ մե՛նք՝ փաստաբաններս, ունենք, ոչ թե վարչապետը: Ո՞վ ասաց, որ վարչապետը դատական համակարգի վրա մատ թափ տալու իրավունք ունի: Սա նույն պրոբլեմի շարունակությունն է՝ որ գործադիրը իրեն իրավունք է վերապահում խառնվելու դատական համակարգի խնդիրների մեջ»:
Ուստի Հայկ Ալումյանն առաջարկում է, որ ՄԻԵԴ-ի վճիռներով պահանջվող այդ գումարները հավաքեն գործադիրից և բյուջեի բացերը լրացնեն:
