Այս տարին հայ մշակութային կյանքը նշանավորվում է Արամ Խաչատրյանի ծննդյան 110-ամյակով: Հունիսի 6-ին՝ Արամ Խաչատրյանի ծննդյան օրը, Երևանում կմեկնարկի կոմպոզիտորի անունը կրող 9-րդ միջազգային մրցույթը, նույն օրը նաև տեղի կունենա խաչատրյանական տարվա հանդիսավոր բացումը. «Այս օրն ամբողջ քաղաքը ողողված է լինելու խաչատրյանական երաժշտությամբ, ամբողջ քաղաքը զգալու է Խաչատրյանի երաժշտության շունչը և այն ավանդը, որ նա փոխանցել է մեզ»,- «Առաջին լրատվական»-ի հետ զրույցում ասաց «Արամ Խաչատրյան-մրցույթ» մշակութային հիմնադրամի տնօրեն Աննա Տեր-Հովակիմյանը: Նա նշեց, որ լինելու են հատուկ մրցանակներ։ Ինչպես նախորդ տարիներին, այս տարի ևս առաջին մրցանակային տեղը զբաղեցրած մասնակիցը կարժանանա 15 հազար, երկրորդը՝ 10 հազար, երրորդը՝ 5 հազար ԱՄՆ դոլարին համարժեք դրամի: Իսկ այն մասնակիցը, որ կանցնի եզրափակիչ երրորդ փուլ, սակայն չի արժանանա ոչ մի մրցանակի, կարժանանա 2000 դոլարին համարժեք դրամի խրախուսական մրցանակի:
Ինչպես տեղեկացանք, այս պահին արդեն 26 մասնակից հայտ է ներկայացրել։ Տիկին Տեր-Հովակիմյանը, խոսելով մրցույթի մասնակիցների թվի մասին, նշեց, որ ժյուրիի համար կարևորը որակն է, ոչ թե քանակը. «Ժյուրիի կազմում պատկառելի մարդիկ են, շատ մեծ աշխարհագրությամբ, բացմանը պատվավոր հյուրերի ցանկում է նաև Արամ Խաչատրյանի որդին, հյուրեր՝ տարբեր երկրներից»:
Նշենք, որ մրցույթը կտևի հունիսի 6-14-ը: Հունիսի 14-ին տեղի կունենա գալա համերգ և մրցույթի հանդիսավոր փակում:
Ժյուրիի կազմում են թավջութակահարուհի Անյա Լեխներы (Գերմանիա), Օլե Ակահոշին (ԱՄՆ/Ճապոնիա), Թիմորա Ռոսլերը (Նիդեռլանդներ/Իսրայել), Քրիստիան Ֆլորեան (Ռումինիա/Գերմանիա), Ալեքսեյ Սելեզնյովը (Ռուսաստան), Էրկի Լահեսման (Ֆինլանդիա): Պատվավոր հյուրերի ցանկում է Ավստրիայի արքայադուստր Իրինան:
«Առաջին լրատվական»-ը տեղեկացավ նաև, որԱրամ Խաչատրյանին նվիրված 2013-2014 համերգային սեզոնը մրցույթից հետո կշարունակվի, աշխարհի մի շարք երկրներում կհնչի խաչատրյանական երաժշտությունը:
Տիկին Տեր-Հովակիմյանի փոխանցմամբ՝ հնարավոր է, որ Խաչատրյանը հնչի ոչ ավանդական կերպով, ինչպես մենք անընդհատ լսել ենք: Կարվի նոր գործիքավորում՝ այդ կերպ փորձելով հանրությանն ավելի մատչելի դարձնել Խաչատրյանի ստեղծագործություններին: