Շատ հետաքրքիր առաջարկներ ունեմ մեր տարածաշրջանի եւ Կովկասի անվտանգության հարցերով, Մինսկում ՌԴ նախագահ Պուտինին ընդունելով ասել է Բելառուսի նախագահ Լուկաշենկոն: Նա հայտարարել է, որ առաջարկները լրջորեն քննարկել է Ադրբեջան կատարած այցի ընթացքում: Ըստ ամենայնի, Պուտինը հենց այդ առաջարկների համար էլ ժամանել է Մինսկ:
Լուկաշենկոն Բաքվում էր մի քանի օր առաջ, որտեղ նա Ալիեւին «հռչակեց» ռեգիոնի լիդեր, ըստ ամենայնի ոչ առանց Պուտինի համաձայնության: Լուկաշենկոն հայտարարեց, որ Կովկկասի կայունության պատասխանատվությունն այժմ Բաքվի վրա է, որովհետեւ այն ռեգիոնի լիդերն է: Փաստորեն, ՀԱՊԿ անդամ Լուկաշենկոն ազդարարեց, որ կազմակերպությունը չէ կովկասյան ռեգիոնի կայունության պատասխանատուն, այլ ՀԱՊԿ ոչ անդամ Ալիեւը: Թե՞ Լուկաշենկոյի առաջարկները ներառում են Ադրբեջանին ՀԱՊԿ որեւէ կարգավիճակի շնորհում:
Սա դժվար է պատկերացնել, եթե հաշվի առնենք, որ Ադրբեջանն իր բանակը արդիականացրել է ՆԱՏՕ ստանդարտով, իսկ շաբաթներ առաջ էլ ՆԱՏՕ գլխավոր քարտուղարից ստացել է դրվատանք այդ առնչությամբ, նաեւ հետագա գործընկերության հավաստիք: Մյուս կողմից, Ալիեւի քաղաքականությանը բնորոշ կլինի՝ ՆԱՏՕ հետ աշխատելուն զուգահեռ, դիտորդի կարգավիճակ ստանալ ՀԱՊԿ-ում: Առավել եւս, որ այդ թեման շրջանառվել է շատ վաղուց: Ընդ որում, այստեղ բավականին «պիկանտ» վիճակ է Հայաստանի համար։ Երեւանը հայտարարել է, որ սառեցնում է հարաբերությունը ՀԱՊԿ-ի հետ, նաեւ հայտարարել է, որ դադարեցրել է կազմակերպության ֆինանսավորումը:
Եթե առաջանա Ադրբեջանի կարգավիճակի հարց, ապա Երեւանը հայտնվելու է երկիմաստ վիճակում: Մի կողմից մերժելու համար պետք է «ապասառեցնի» իր վարքը, իսկ մյուս կողմից էլ՝ առանց Երեւանի հնարավոր չէ որեւէ մեկին տալ որեւէ կարգավիճակ, ՀԱՊԿ որոշումները կայացվում են կոնսենսուսով: Եթե Երեւանը տորպեդահարի Ադրբեջան-ՀԱՊԿ հարաբերության «իրավականացման» որեւէ գաղափար, ապա դա փաստացի կարող է բերել լարվածության Հայաստան-Ադրբեջան գործընթացում, դառնալով Ադրբեջանի համար Երեւանին «ապակառուցողականության» դիտողություն ներկայացնելու եւ այդպիսով իր ախակառուցողականությունը արդարացնելու առիթ:
Եթե Երեւանն ընդառաջի, ապա կստացվի, որ ապասառեցնում է իր անդամությունը ՀԱՊԿ-ում, ինչը կլինի նոր իրավիճակ: Սա իհարկե մի վարկած է, թե ինչ կարող է մտածած լինել Լուկաշենկոն կամ Ալիեւը, որը այժմ փոխանցում են Պուտինին: Ի դեպ, ՌԴ ԱԳՆ հանկարծ հայտարարել է, որ խորհրդակցությունների նպատակով Մոսկվա են կանչում Հայաստանում դեսպան Կոպիրկինին: Այդպիսի որոշումներ կայացվում են թերեւս երկու դեպքում, եթե՝ կամ լուրջ կոնֆլիկտ կա տվյալ երկրի հետ, կամ՝ կայացվելու է բավականին էական որոշում, այդ երկրին առնչվող:
