Georgia Online-ի փոխանցմամբ՝ Վրաստանի հաշտեցման ու քաղաքացիական իրավահավասարության հարցերով պետնախարար Պաատա Զաքարեիշվիլին բացառել է, որ Ռուսաստանը կվերականգնի Վրաստանի տարածքային ամբողջականությունը, եթե անգամ պաշտոնական Թբիլիսին հրաժարվի ԵՄ-ին ու ՆԱՏՕ-ին անդամակցելուց։
«Գոյություն ունի կարծիք, որ եթե մենք հրաժարվենք ՆԱՏՕ-ից ու ԵՄ-ից, Ռուսաստանը կվերականգնի Վրաստանի տարածքային ամբողջականությունը։ Դա բացառված է։ Մենք ունեիքն այսպիսի դիրքորոշում, երբ Էդուարդ Շևարդնաձեն պատերազմից հետո առաջարկեց մտնել ԱՊՀ, և որ դրանով կկարգավորվեն Աբխազիայի, ու այսպես կոչված Հարավային Օսիայի խնդիրները։ Մենք տեսել ենք, որ ամեն ինչ ճիշտ հակառակն է»,- ասել է Զաքարեիշվիլին։
Նախարարը հավելել է, որ ՆԱՏՕ-ի և ոչ մի երկրում դաշինքի ստեղծումից հետո չեն եղել ռազմական գործողություններ, մինչդեռ դրանք առկա են ԱՊՀ-ի դեպքում. «Ես չեմ խոսում միայն ռուս-վրացական հակամարտության մասին։ Որպես օրինակ՝ վերցնենք Ուկրաինան։ ԱՊՀ-ի երկրներ են նաև Հայաստանն ու Ադրբեջանը»։