Առաջիկա նախագահական ընտրություններին իր թեկնածությունն առաջադրած էպոսագետ Վարդան Սեդրակյանն այսօր գոհունակությամբ նշեց, որ իր կանխատեսումն իրականացավ՝ հանրապետության երկու նախկին նախագահները նախագահական ընտրություններին չեն առաջադրվի, այսինքն՝ կատարվեց այն, ինչ ինքը նախապես էր ասել:
Նա հրապարակավ իր շնորհակալությունն ու գոհունակությունը հայտնեց առաջին նախագահին՝ խորապես վստահ լինելով, որ որևէ քաղաքական գործչի գոռոզությունը թույլ չէր տա այդ բառերն ասել, սակայն ինքն ասում է:
«Լևոն Տեր-Պետրոսյանը իր առաջադրվելով կարող էր ավելորդ խոչընդոտ ստեղծել իմ քարոզարշավի ընթացքում»,- ասաց Վարդան Սեդրակյանը:
Նա նաև Լևոն Տեր-Պետրոսյանին շնորհակալություն հայտնեց 88-ի շարժման, «Ղարաբաղ» կոմիտեի ստեղծման համար. «Փաստ է, որ նրա ժամանակ մենք պատերազմից դուրս եկանք ոչ հաղթանակած, բայց շահած»,- հավելեց էպոսագետը:
Նա նաև Ռոբերտ Քոչարյանին շնորհակալություն հայտնեց` չառաջադրվելու համար` հավելելով, որ իր՝ նախագահ դառնալուց հետո ՀՀ երեք նախկին նախագահները կլինեն իր ավագ խորհրդականները: Նա ասաց, որ Սերժ Սարգսյանը միգուցե առաջադվի, բայց քաղաքակիրթ ընտրական պայքարում կպարտվի և հետո կլինի նույնպես իր ավագ խորհրդականը:
Վարդան Սեդրակյանի գաղափարախոսությունը «Սասնա ծռեր» էպոսն է, որը չի կարող լինել միայն ընդդիմության էպոսը. այն բոլոր հայերի էպոսն է:
Րաֆֆի Հովհաննիսյանը նույնպես նրա ճանապարհին չի կարող խոչընդոտ հանդիսանալ, քանի որ ինքը փորձեց օգնել Րաֆֆի Հովհաննիսյանին՝ գումար առաջարկելով, սակայն վերջինս հրաժարվեց:
Իսկ Գագիկ Ծառուկյանին շնորհակալություն հայտնելու իմաստ չի տեսնում, որովհետև Գագիկ Ծառուկյանի ԲՀԿ-ն իր համար քաղաքական կուսակցություն չէ, այն ՀՀԿ-ի դուստր ձեռնարկություն է, և ինչպես կասեն կուսակցության ղեկավարները, այնպիսի որոշում էլ կընդունի ԲՀԿ-ն: «Հիմա եթե շնորհակալություն ենք հայտնում Ռոբերտ Քոչարյանին, ուրեմն շնորհակալության մի մասն էլ ուղղված է Գագիկ Ծառուկյանին»,- հավելեց նախագահի թեկնածուն:
Նա նաև նշեց, որ ինքը որևէ կապ չունի «Սասունցի Դավիթ» խմբի հետ, որի անդամ էր Նաիրի Հունանյանը. բոլոր համապատասխան կառույցները գիտեն, որ ինքը կապ չունի այդ խմբի հետ:
Էպոսագետի հավաստիացմամբ` եթե Սերժ Սարգսյանը փող չբաժանի, նախագահ չի դառնա:
Նախագահ դառնալուց հետո Վարդան Սեդրակյանի առաջնային խնդիրը այս ԱԺ-ն լուծարելն է և նոր ու արդար ընտրությունների անցկացումը:
Նրա քարոզարշավը կանցնի երգուպարով, կլինի մշակութային-գեղարվեստական բնույթի, և թող որևէ մեկը չզարմանա, եթե նախընտրական տեսահոլովակի մեջ չգտնի էպոսագետին:
