ՄԱԿ-ի Անվտանգության խորհուրդը Իսրայելին և պաղեստինցիներին կոչ է արել պայմանավորվել Գազայի հատվածում տևական հրադադարի շուրջ՝ անհանգստություն արտահայտելով տարածաշրջանում ճգնաժամի սրման և կողմերի ռազմական գործողությունների զոհերի թվի աճի առնչությամբ: ՄԱԿ ԱԽ դիրքորոշումն արտահայտվել է արտակարգ նիստի արդյունքներով խորհրդի նախագահ, համաշխարհային կազմակերպությունում Ռուանդայի մշտական ներկայացուցիչ Ռիշար Հասանի հայտարարության մեջ:
Համաձայն հայտարարության՝ ՄԱԿ ԱԽ-ն բոլոր կողմերին կոչ է անում միավորել ջանքերը՝ հասնելու տևական և լիարժեք պահպանվող հրադադարի՝ հիմնված եգիպտական նախաձեռնության վրա: Այս մասին փոխանցում է RIA Novosti-ն:
ՄԱԿ ԱԽ-ն աջակցություն է հայտնել նաև մուսուլմանական Ուրազա Բայրամ տոնի ժամանակ մարդասիրական հրադադարի հայտարարման Պան Գի Մունի կոչին:
«ՄԱԿ ԱԽ-ն ընդգծում է, որ քաղաքացիական և մարդասիրական օբյեկտները՝ ներառյալ ՄԱԿ-ին առնչվող, պետք է հարգվեն և լինեն պաշտպանված, և բոլոր կողմերին կոչ է արել գործել այդ սկզբունքին համապատասխան»,-ասվում է հայտարարության մեջ:
